لاہور(این این آئی) وزیرِ اطلاعات پنجاب فیاض الحسن چوہان نے سینیٹ سے دو انتہائی اہم بلوں کی منظوری پر وزیراعظم عمران خان اور انکی ٹیم کو مبارکباد دیتے ہوئے کہا ہے کہ اقوام متحدہ سکیورٹی کونسل (ترمیمی) ایکٹ 1948 اور انسدادِ دہشت گردی ایکٹ 1997 سے متعلقہ ترمیمی بل کی منظوری سے پاکستان کا ایف اے ٹی ایف کی گرے لسٹ سے نکلنے کی ڈیڈ لائن تک جلد پہنچنا ممکن ہو سکے گا۔

دونوں بلوں کا بنیادی مقصد ایف اے ٹی ایف کی گرے لسٹ سے نکلنے کے لیے شرائط کو پورا کرنا تھا۔ ان خیالات کا اظہار وزیرِ اطلاعات پنجاب نے اپنے حلقے میں ملاقات کے لیے آنے والے مختلف عوامی وفود سے ملاقات کے دوران کیا۔ اس موقع پر انہوں نے کہا کہ دہشتگردوں کی مالی معاونت میں ملوث افراد اور اداروں کے اثاثہ جات کی ضبطگی اور منجمند کرنے، سفری پابندیوں اور ہتھیاروں کی روک تھام سے متعلق قانون سازی پاکستان کی بین الاقوامی امن کے لیے کوششوں کی مثال ہے۔ ان بلوں کی منظوری سے بھارت کی پاکستان کو عالمی سطح پر تنہا کرنے کی سازش ایک بات پھر ناکام ہو گئی۔ فیاض الحسن چوہان نے کہا کہ حکومت گرانے کی خوش فہمیوں میں مبتلا مولانا فضل الرحمان اور غیر متحدہ اپوزیشن کو اس سارے منظر نامے کے بعد عقل آ جانی چاہیئے۔ انہوں نے مزید کہا کہ غیر متحدہ اپوزیشن فیک تو ہو سکتی ہے، لیکن ایک اور نیک کبھی نہیں ہو سکتی۔ مولانا کی شہباز شریف اور بلاول زرداری کو ملانے کی ساری جدوجہد پر پہلے ہی پانی پھر چکا ہے۔ فیاض الحسن چوہان نے یہ بھی کہا کہ شہباز اور بلاول کی مشترکہ پریس کانفرنس کے آخری دو منٹ نے ان کے اتحاد کا پول کھول دیا۔ دونوں رہنماں کی ایک دوسرے پر ذمہ داری ڈالنے کی ناکام کوشش ساری پاکستانی عوام نے لائیو دیکھی۔ انہوں نے کہا کہ مولانا فضل الرحمان بھی عید کے بعد اپوزیشن جماعتوں سے مل کر ایک بار پھر تحریک چلانے کا چسکا پورا کر لیں۔ اس نام نہاد تحریک کا حشر بھی سابقہ تحریکوں سے مختلف نہیں ہو گا۔