لاہور (آن لائن) ترجمان پنجاب حکومت مسرت جمشید چیمہ نے کہا ہے کہ مولانا فضل الرحمان نے اپنے بھائی کی بطو ر ڈپٹی کمشنر سنٹرل کراچی تعیناتی کرا کے پیپلز پارٹی سے اپنا حصہ وصول کرلیا ہے ، اپوزیشن کی آل پارٹیز کانفرنس ہو گی یا نہیں یہ پر اسرار کہانی ہے لیکن اس سے پہلے ہی جوتیوں میں دال بٹ رہی ہے،25جولائی کا دن پاکستانی قوم کی زندگیوں میں حقیقی تبدیلی کا دن ہے ،عمران خان نے22سال کی
طویل جدوجہد سے سٹیٹس کو کی حامل قوتوں کوشکست دی۔میڈیا کیلئے جاری کئے گئے اپنے ویڈیو بیان میں ترجمان پنجاب حکومت مسرت جمشید چیمہ نے کہا کہ گزشتہ دنوں مولانا فضل الرحمان اور آصف زرداری کے درمیان ہونے والی ملاقات کا نتیجہ ضیاء الرحمان کی تعیناتی کی ڈپٹی کمشنر سنٹرل کراچی کی صورت میں سامنے آیا ہے ، پوری قوم نے دیکھ لیا ہے کہ پیپلز پارٹی حکومت کے پلیٹ فارم کو اپنے ذاتی مفادات اور ایجنڈے کیلئے استعمال کرتی ہے ۔ مولانا فضل الرحمان ہر دور میں حصہ وصول کرنے کیلئے مشہور ہیں اور انہوںنے اب پیپلز پارٹی سے بھائی کی تعیناتی کی صورت میں اپنا ٹوکن وصول کر لیا ہے ۔ انہوںنے مزیدکہا کہ اپوزیشن کے پاس حکومت کے خلاف تحریک شروع کرنے کیلئے کوئی جواز نہیں اور اس کے لئے زور زبردستی کی جارہی ہے۔اپوزیشن جماعتوں کی آل پارٹیز کانفرنس ہو گی یا نہیں یہ پر اسرار کہانی ہے البتہ جوتیوں میں دال ضرور بٹ رہی ہے اور آنے والے دنوں ہوشربا انکشافات عوام کے سامنے آئیں گے۔ ترجمان پنجاب حکومت مسرت جمشید چیمہ نے کہا کہ وزیرا عظم عمران خان کی قیادت میں پاکستان مثبت سمت میں بڑھ رہا ہے اور اپنی منزل مقصود تک پہنچے گا ،مافیاز کی جانب سے آخری حربے کے طور پر بھرپور مزاحمت جاری ہے لیکن انہیںہر صورت شکست دیں گے۔
