اسلام آباد (این این آئی، آن لائن)وفاقی وزیر برائے سائنس و ٹیکنالوجی فواد چوہدری نے سورج گرہن سے پہلے اپنے بیان میں کہا ہے کہ امید ہے مولانا صاحبان ’خالی آنکھ‘ سے سورج گرہن دیکھنے پر اصرار نہیں کریں گے۔سماجی رابطے کی ویب سائٹ ٹوئٹر پر سورج گرہن کے حوالے ایک مختصر پیغام شیئر کیا۔

انہوں نے لکھا کہ امید ہے مولانا صاحبان ’خالی آنکھ‘ سے سورج گرہن دیکھنے پر اصرار نہیں کریں گے، نئی مصیبت ہی نہ پڑ جائے۔انہوں نے ہیش ٹیگ ’solareclipse‘ کا استعمال بھی کیا۔دریں اثناسماجی رابطے کی ویب سائٹ ٹوئٹرپر اپنے ایک ٹویٹ میں وفاقی وزیربرائے سائنس وٹیکنالوجی فواد چوہدری نے کہا کہ اس سال چھ گرہن ہونے ہیں، چار چاند گرہن اور دو سورج گرہن، اس سال کا دوسرا گرہن 14 دسمبرکوہوگا لیکن وہ پاکستان میں نہیں دیکھا جا سکے گا۔ اتوار کو مکمل سورج گرہن سکھر اور اس کے گردو نواح میں دیکھا گیا باقی علاقوں میں جزوی گرہن رہا ۔فواد چوہدری نے گرہن سے متعلق مزید کہا کہ جب انسان کا علم بہت محدود تھا تو توہم پرستی بھی عروج پر تھی ، ہر شے جو پسند آتیتھی اسے خوش قسمتی اور جس چیز سے خوف آتا تھا اسے عذاب سے جوڑ دیا جاتا تھا، گرہن بھی ایسا ہی عمل تھا، اب سائنس نے گرہن کی قلعی کھول دی ہے تو اس سے جڑی توہم پرستی کی کہانیاں بھی آخری سانسیں لے رہیں ہیں۔