ریاض ،لاہور ( آن لائن )سعودی عرب میں سورج گرہن لگنے کے ساتھ ہی مکہ مکرمہ میں بیت اللّٰہ میں نمازِ کسوف ادا کی گئی۔سعودی عرب میں سورج گرہن کے موقع پر بیت اللہ ، مسجد نبویؐ اور مملکت کے تمام شہروں کی مساجد میں نمازِکسوف کی ادائیگی کی گئی۔
نمازِ کسوف کی ادائیگی کے دوران بیت اللہ ، مسجد نبوی اور دیگر مساجد میں کورونا ایس او پیز کا خاص خیال رکھا گیا۔ لوگوں نے اس موقع پر اپنے رب کے حضور گڑ گڑا کر معافی مانگی اور توبہ و استغفار کی۔سورج گرہن سعودی عرب کے علاوہ پاکستان سمیت افریقہ اور ایشیاء کے کئی ممالک میں دیکھا گیا۔دریں اثنا لاہور میں سورج گرہن کے دوران جامع مسجد منصورہ، جامع مسجد پنجاب یونیورسٹی سمیت شہر کی مختلف چھوٹی بڑی مساجد میں نمازِ کسوف ادا کی گئی۔اس موقع پر گناہوں کی مغفرت اور توبہ کے لیے خصوصی دعائیں کی گئیں۔لاہور میں سورج گرہن کے دوران جماعتِ اسلامی کے مرکز منصورہ کی جامع مسجد میں شیخ القرآن مولانا عبدالمالک نے نمازِ کسوف پڑھائی۔ امیر جماعتِ اسلامی سینیٹر سراج الحق، حافظ محمد ادریس اور حافظ ساجد سمیت شہریوں کی بڑی تعدا دموجود تھی۔نماز کے بعد گناہوں کی مغفرت اور توبہ کے لیے دعائیں کی گئیں۔اس موقع پر امیرِ جماعتِ اسلامی سینیٹر سراج الحق نے خطاب کرتے ہوئے کہا کہ چاند اور سورج گرہن اللّٰہ تعالیٰ کی نشانیوں میں سے ہیں۔ انہوں نے کہا کہ حضوراکرم ؐنے سورج اور چاند گرہن کے موقع پر نمازِ کسوف ادا کی، سورج گرہن کے موقع پر اللّٰہ تعالیٰ سے توبہ و استغفار کرنا چاہیے۔امیرِ جماعتِ اسلامی سنیٹر سراج الحق نے اس موقع پر تلقین کی کہ جب تک سورج گرہن رہتا ہے گھروں میں کلام پاک کی تلاوت کی جائے۔
