اسلام آباد(آن لائن) شوگر ملز ایسوسی ایشن نے چینی بحران پر انکوائری کمیشن کی رپورٹ کو اسلام آباد ہائی کورٹ میں چیلنج کردیا۔جہانگیر ترین سمیت16ملز مالکان کی درخواست کی سماعت جمعرات کو چیف جسٹس اسلام آباد ہائیکورٹ جسٹس اطہرمن اللہ کریں گے۔میڈیا رپورٹس کے مطابق چینی بحران اور قیمتوں میں اضافے پر انکوائری کمیشن کی رپورٹ کو جہانگیر ترین سمیت 16 ملز مالکان نے اسلام آباد ہائیکورٹ میں چیلنج کردیا ہے۔شوگر ملز ایسوسی ایشن کی درخواست
جمعرات کو سماعت کیلئے مقرر کی گئی ہے جس کی سماعت چیف جسٹس اسلام آباد ہائیکورٹ جسٹس اطہرمن اللہ کریں گے۔شوگر ملز ایسوسی ایشن نے درخواست میں مؤقف اپنایا ہے کہ تحقیقاتی کمیشن نے رپورٹ کی تیاری میں اپنے آئینی اختیار سے تجاوز کیا۔انکوائری کا عمل متعصب،امتیازی اور غیر قانونی ہے۔اس لئے عدالت سے انکوائری کمیشن کی رپورٹ کالعدم قرار دینے اور حکومت کو شوگرملز مالکان کے خلاف کارروائی سے روکنے کی استدعا کی گئی ہے۔
