اسلام آباد (این این آئی) پاکستان نے کویتی حکام کی درخواست پر 600 ہیلتھ ورکرز کویت بھیجنے کا فیصلہ کرلیا ۔ جمعرات کو معاون خصوصی زلفی بخاری نے کویت میں پاکستانی کمیونٹی سے ٹیلی کانفرنس سے خطاب کرتے ہوئے کہاکہ کویتی حکام کی درخواست پر 600 ہیلتھ ورکرز کویت بھیجنے کا فیصلہ کیا گیا ۔ انہوںنے کہاکہ ہیلتھ ورکرز میں نرسز اور ڈاکٹرز شامل ہوں گے،
اس سے دونوں ممالک کے مابین تعلقات بڑھیں گے۔ زلفی بخاری نے کہاکہ کویت میں پھنسے 5500 پاکستانیوں کے لئے خصوصی پرواز چلانے کا بھی فیصلہ کیا گیا ۔ زلفی بخاری نے کہاکہ آئندہ دو ہفتوں میں 4 پروازوں پر پاکستانیوں کو واپس لایا جائے گا،ہر ہفتے 12000 پاکستانیوں کو وطن واپس لانے کے قابل ہو گئے ہیں۔ زلفی بخاری نے کہاکہ واپس آنے والے بیروزگار پاکستانیوں کا ڈیٹا پورٹل پر موجود ہوگا،جون میں پورٹل کا آغاز کر دیا جائے گا۔ انہوںنے کہاکہ بیروزگار وطن واپس آنے والے پاکستانیوں کو ہنرمند اور کامیاب جوان پروگرام کے تحت روزگار دیا جائے گا۔انہوںنے کہاکہ بہت جلد مفت ویزا توسیع کے لئے لیبر منسٹر سے بات کروں گا۔
