لاہور(نیوزڈیسک)صوبائی دارالحکومت کے علاقہ ماڈل ٹاﺅن میں ایک شخص نے مبینہ طورپر اپنی بیوی اور تین بچوں کو قتل کرنے کے بعد خود کشی کر لی ،پڑوسیوں کی اطلاع پر پولیس نے گھر سے تعفن زدہ لاشیں برآمد کر کے پوسٹمارٹم کےلئے ہسپتال منتقل کرکے واقعہ کی اصل وجوہات جاننے کےلئے تحقیقات شروع کر دیں۔ بتایا گیا ہے کہ گزشتہ روز ماڈل ٹاﺅن کے علاقہ کیو بلاک میں واقع ایک گھر سے شدید بد بو آنے پر پڑوسیوںنے پولیس کو اطلاع دی ۔ اطلاع ملنے پر پولیس کی بھاری نفری موقع پر پہنچی تو مرکزی دروازے پر تالہ لگا ہوا جسے توڑنے کے بعد پولیس اندر گئی تو گھر میں پانچ لاشیں موجود تھیں ۔ پولیس کے حوالے سے بتایا گیا ہے کہ ابتدائی طور پر ایسا معلوم ہوتا ہے کہ خاوند نے اپنی بیوی اور بچوں کو قتل کرنے کے بعد خود کشی کی ہے ۔ جن میں 42سالہ بشارت،35سالہ فائزہ، آٹھ سالہ عبد اللہ ،چھ سالہ عبد الہادی اور حسہ شامل ہیں ۔ پولیس کا کہنا تھاکہ اصل وجوہات پوسٹمارٹم کے بعد ہی سامنے آئیں گی تاہم مختلف پہلوﺅں سے بھی تحقیقات شروع کر دی گئی ہیں۔