لاہور( این این آئی )چیئرمین پنجاب فوڈ اتھارٹی اور ڈی جی فوڈ اتھارٹی کی سربراہی میں جعلساز مافیا کے خلاف گرینڈ آپریشن کر کے 6ہزار کلوملاوٹی مضر صحت فنگس لگے مصالحہ جات اور بھار ی مقدار میں جعلی پیکنگ برآمد کر کے تلف کر دی گئی جبکہ گرائنڈنگ یونٹ کو سیل کر دیا گیا ۔ڈی جی فوڈ اتھارٹی عرفان میمن کے مطابق کرول گھاٹی شالیمار ٹائون میں

حاجی صدیق گرائنڈنگ یونٹ میں مضر صحت فنگس لگی ثابت مرچ میں کیمیکل اور رنگ شامل کر کے سرخ مرچ پائوڈر تیار کیا جا رہا تھا،سابقہ دی گئی ہدایات کی خلاف ورزی،ورکرز کے میڈ یکل اورریکارڈ کی عدم دستیابی پریونٹ کو سیل کیا گیا۔عرفان میمن نے کہا کہ چیکنگ کے دوران نامناسب سٹوریج اور صفائی کے انتہائی ناقص انتظامات پائے گئے،مصالحہ جات کوبغیر ڈھانپے ہی زمین پر رکھا گیا تھا،مضر صحت ناقص سرخ مرچ پائوڈر کو دلکش پیکنگ لگا کرمختلف ہوٹلوں،ڈھابوں پر سپلائی کیا جاتا تھا۔ڈی جی فوڈ اتھارٹی عرفان میمن نے کہا کہ کھانوں میں ملاوٹی مصالحہ جات کا استعمال پیٹ،معدے اور انتڑیوں کی موذی بیماریوں کا باعث بنتاہے۔