نئی دہلی(این این آئی) بھارتی حکومت نے سپریم کورٹ میں مقبوضہ کشمیر کے سابق وزیر اعلی عمر عبداللہ کی نظربندی کی وجوہات میں سے ایک وجہ پاکستان کے ساتھ جموں و کشمیر کی جغرافیائی قربت بتایا ہے۔کشمیرمیڈیاسروس کے مطابق بھارتی حکومت کی جانب سے اعلی عدالت میں دائر حلف نامے میں کہا گیا ہے کہ امن وامان برقرار رکھنے کے حوالے سے جموں و کشمیر اور لداخ کی
انتہائی مخصوص جغرافیائی پوزیشن اوراسلامی جمہوریہ پاکستان کے ساتھ قربت کو ذہن میں رکھنے کی ضرورت ہے۔ بھارتی حکومت نے اپنے جواب میں کہا کہ سابق وزیر اعلی عمر عبداللہ 5 اگست سے پہلے ہی دفعہ 370 کی منسوخی کے سخت ناقد رہے ہیں۔ بھارتی حکومت نے اس بات پر زور دیا ہے کہ عمر عبداللہ کو امن و امان برقرار رکھنے کے لئے نظربند کیا گیا ہے۔ بھارتی سپریم کورٹ نے اس معاملے پر گزشتہ روز ایک مختصرسی سماعت کے بعد کہاکہ کسی شخص کی آزادی سے متعلق معاملے کی عدالت سماعت کر سکتی ہے۔ عدالت نے سارہ عبداللہ کی جانب سے اس کے بھائی اور جموں و کشمیر کے سابق وزیر اعلی عمر عبداللہ کی گرفتاری کے خلاف دائر درخواست کی سماعت کرنے پر اتفاق کیا ہے۔ سارہ عبداللہ نے عدالت عظمیٰ میں عمر عبداللہ کوحبس بے جا میں رکھنے کی درخواست دائرکررکھی ہے۔
