لاہور (آن لائن) امیر جماعت اسلامی پاکستان سینیٹر سراج الحق نے طالبان امریکہ کے درمیان ہونے والے معاہدہ کا خیر مقدم کرتے ہوئے کہاہے کہ ہم معاہدہ کی کامیابی کی خواہاں ہیں۔ امریکہ اپنے وعدے کے مطابق فوری طور پر افغانستان سے نکل جائے۔
انہوں نے کہاکہ دوسرا اہم ترین مرحلہ بین الافغان مذاکرات ہیں۔اب افغانستان کے اندرونی معاملات میں بیرونی مداخلت ختم ہونی چاہیے۔ہمیں امید ہے کہ معاہدے سے افغانستان میں امن قائم ہوگا۔ اب بین الافغان مذاکرات ہونے چاہئیں۔پاکستان کو افغانستان میں امن کے قیام کے لیے نتیجہ خیز کوششیں جاری رکھنی چاہئیں۔ امریکہ کے آنے سے پاکستان اور افغانستان کو جو نقصان پہنچا ہے امریکہ کو اس کی تلافی کرنی چاہیے۔نائب امیر جماعت اسلامی اور سابق ممبر قومی اسمبلی لیاقت بلوچ نے افغان طالبان اور امریکہ کے درمیان امن معاہدے پراپنے ردعمل میں کہاہے کہ افغان عوام نے بے مثال استقامت سے امریکہ کو سرنڈر کرنے پر مجبور کیا ہے۔ برطانیہ، سوویت یونین کے بعد امریکہ بھی افغانستان میں ذلت و رسوائی سے دوچار ہواہے۔ لیاقت بلوچ نے کہاکہ طالبان قیادت اور افغان قیادت جہاد افغانستان کے بعد کے نتائج سے سبق سیکھتے ہوئے افغانستان کو امن و استحکام کا گہوارہ بنائیں۔ انہوں نے کہاکہ پاکستان نے ایک طویل مدت سے بہتر حکمت عملی کے ساتھ ہمیشہ افغانستان میں امن و استحکام کے لیے کردار ادا کیاہے اور ہمیشہ بہادر افغان عوام کا ساتھ دیاہے۔
