اسلام آباد(این این آئی) وزیر اعظم عمران خان نے کہا ہے کہ عوامی ریلیف کیلئے کچھ بھی کرنا پڑے کرونگا،قیمتوں میں کمی کیلئے ہر حد تک جائیں گے، ملک میں مہنگائی سابقہ حکومت کی لوٹ مارکا نتیجہ ہے، ذخیرہ اندوزوں نے بھی معاملات خراب کئے،جن میں بنیاد ی اشیاء خریدنے کی سکت نہیں،حکو مت انہیں راشن دے گی،غریب کی بہتری کیلئے ہی حکومت میں آئے ہیں۔

ہفتہ کو وزیراعظم عمران خان کی زیر صدارت اعلی سطحی اجلاس ہوا جس میں کھانے پینے کی اشیاء کی سستے نرخوں فراہمی پر غورکیا گیا۔اجلاس میں مشیر خزانہ حفیظ شیخ، وفاقی وزیر برائے ریوینیو حماد اظہر،جہانگیر ترین، شہباز گل،ثانیہ نشتر،وفاقی وزیر برائے بحری امور علی زیدی اور چیئرمین یوٹیلیٹی اسٹور نے شرکت کی۔اجلاس میں عوامی ریلیف کے لئے اہم فیصلے کیے گئے۔وزیراعظم نے بنیادی اشیائے ضروریہ کی قیمتیں ہر صورت کم کرنے کی ہدایت کی۔آٹا،گھی، چینی، چاول اور دالوں کی قیمتیں کم کرنے کا فیصلہ کیا گیا۔وزیر اعظم نے واضح ہدایت کی کہ کچھ بھی کریں عوام کو ریلیف دیں۔انہوں نے کہا کہ عوامی ریلیف کے لئے کچھ بھی کرنا پڑے کروں گا،قیمتوں میں کمی کے لئے ہر حد تک جائیں گے۔انہوں نے کہا کہ عام آدمی کے کچن میں بنیادی اشیاء ہر حال میں پہنچائیں،جن میں خریدنے کی سکت نہیں انہیں حکومت راشن دے گی۔انہوں نے کہا کہ احساس پروگرام کے تحت انتہائی غریب افراد کو راشن دیں، اگر غریب کا احساس نہیں کر سکتے توحکومت میں رہنے کاحق نہیں۔وزیر اعظم نے مشیر خزانہ حفیظ شیخ کو بھی اہم اقدامات کی ہدایت کی۔وزیر اعظم نے کہا کہ کسی بھی چیز کے پیسے کاٹیں مگر غریب آدمی کو سہولت دیں،غریب کی بہتری کیلئے ہی حکومت میں آئے ہیں۔انہوں نے کہا کہ ملک میں مہنگائی سابقہ حکومت کی لوٹ مارکا نتیجہ ہے، ذخیرہ اندوزوں نے بھی معاملات خراب کئے۔وزیراعظم نے یوٹیلیٹی اسٹو ر کے چیئر مین کی کارکردگی کو سراہا۔وزیر اعظم نے کہا کہ آٹا بحران میں یوٹیلیٹی اسٹورز نے بہترین کام کیا۔وزیر اعظم کو بریفنگ دی گئی کہ یوٹیلیٹی اسٹورز کی سیل میں 800 فیصدتک اضافہ ہوا۔

موضوعات:عمران خان