فیصل آباد(این این آئی)جی سی یونی ورسٹی میں مضر صحت کھانا کھانے سے 25 طالبات کی طبیعت خراب ہو گئی۔میڈیا رپورٹ کے مطابق جی سی یونی ورسٹی فیصل آباد کے گرلز ہاسٹل میں مبینہ طور پر مضر صحت کھانا کھانے سے 25 طالبات بیمار ہو گئیں۔
یہ واقعہ گزشتہ روز پیش آیا، یونی ورسٹی ذرائع نے بتایا کہ طالبات کو ایمبولینس کی بہ جائے نجی گاڑیوں میں ہسپتال منتقل کیا گیا۔ذرائع کے مطابق گرلز ہاسٹل کا کھانا کھانے کے بعد طالبات کی طبیعت بگڑ گئی، تاہم انھیں کئی گھنٹوں کے بعد سول ہسپتال علاج کیلئے منتقل کیا گیا، یونی ورسٹی میں خبر پھیل گئی تھی ، انتظامیہ کی طرف سے معاملہ دبانے کی کوشش کی گئی۔ذرائع کے مطابق انتظامیہ نے متاثرہ طالبات کو خاموش رکھنے کے لیے نکالنے کی دھمکی بھی دی ، طالبات کئی بار ناقص کھانے اور خراب پانی کی شکایات کر چکی ہیں۔ ہسپتال منتقل کیے جانے والی طالبات میں سے کئی کی حالت خراب بتائی جا رہی ہے۔یونی ورسٹی انتظامیہ نے دعویٰ کیاکہ فوڈ اتھارٹی کی ٹیم کو کھانے کے نمونے فراہم کر دیے گئے ہیں، نیز یہ کہنا مشکل ہے کہ طالبات کی صحت کھانا کھانے ہی سے ہوئی، رپورٹ سامنے آنے کے بعد کوئی فیصلہ کیا جائے گا۔
