کراچی (این این آئی)سابق چیف الیکشن کمشنر اور سابق اٹارنی جنرل جسٹس (ر) فخر الدین جی ابراہیم 92 سال سال کی عمر میں انتقال کر گئے۔ان کو میوہ شاہ میں واقع نور باغ قبرستان میں سپرد خاک کردیا گیا ۔نماز جنازہ میں سیاسی و سماجی شخصیات ،قانون دانوں اور مختلف شعبہ ہائے زندگی سے تعلق رکھنے والی اہم شخصیات نے شرکت کی۔ تفصیلات کے مطابق معروف قانون دان اور سابق چیف الیکشن کمشنر فخرالدین جی ابراہیم ایک عرصے سے شدید علیل تھے اور منگل کو خالق حقیقی سے جا ملے۔فخرالدین جی ابراہیم 2فروری
1928 کو ہندوستان کے شہر گجرات میں ایک لوئر مڈل کلاس فیملی میں پیدا ہوئے اور 1952 میں برطانیہ سے قانون کی ڈگری حاصل کی۔فخر الدین جج ابراہیم سپریم کورٹ کے جج رہنے کے ساتھ ساتھ سندھ ہائی کورٹ کے چیف جسٹس، گورنر سندھ، اٹارنی جنرل اور وفاقی وزیر قانون کے عہدوں پر بھی فائز رہ چکے تھے۔2013 کے عام انتخابات میں فخر الدین جی ابراہیم چیف الیکشن کمشنر تھے اور سایسی جماعتوں کی جانب سے اس الیکشن پر تحفظات کا اظہار کیا گیا تھا جس پر انہوں نے الیکشن کے بعد اپنے عہدے سے استعفیٰ دے دیا تھا۔