واشنگٹن (این این آئی) امریکی وزیر خارجہ مائیک پومپیو نے فلسطینیوں کے خلاف اسرائیلی ریاستی دہشت گردی کی تحقیقات کے حوالے سے عالمی فوج داری عدالت کے اعلان کی مخالفت کی ہے اور کہا ہے کہ عالمی عدالت کا اسرائیلی جنگی جرائم کے واقعات کی تحقیقات کے کیسز کھولنا ناقابل قبول ہے۔ اس حوالے سے امریکا اسرائیل کے ساتھ کھڑا ہے۔میڈیارپورٹس کے مطابق امریکی وزیرخارجہ مائیک پومپیونے اسرائیلی جرائم کی تحقیقات کی مخالفت کرتے ہوئے کہا کہ امریکا کو عالمی عدالت کے اس فیصلے
پر سخت تشویش ہے۔مائیک پومپیو کا کہنا تھا کہ ہم عالمی فوج داری عدالت کے اس اعلان کو مسترد کرتے ہیں۔ اسرائیل کو انتقامی کارروائیوں کا نشانہ بنانے کے لیے یہ بھی ایک غیرمنصفانہ طریقہ ہے کہ تل ابیب کے خلاف مقدمات قائم کیے جائیں اور اسرائیل کو جنگی جرائم کے مقدمات میں گھیسٹا جائے۔انہوں نے کہا کہ ہم نہیں سمجھتے کہ فلسطینی ایک خود مختار ریاست کا درجہ حاصل نہ ہونے کی بناء پر عالمی فوج داری عدالت کو اسرائیل کے خلاف جنگی جرائم کی تحقیقات کی سفارش کرنے کا حق ہے۔
