اسلام آباد (آن لائن) جنوبی پنجاب سے پیپلز پارٹی کے سینئر رہنما اور سابق رکن صوبائی اسمبلی چودھری عثمان وڑائچ پیپلز پارٹی چھوڑ کر پاکستان تحریک انصاف میں شامل ہوگئے۔ مرکزی میڈیا ڈیپارٹمنٹ کی جانب سے جاری تفصیلات کے مطابق پیپلز پارٹی چھوڑ کر تحریک انصاف میں شمولیت کا اعلان کرنے والے چودھری عثمان وڑائچ بوریوالہ کے سابق تحصیل ناظم اور رکن صوبائی اسمبلی پنجاب اسمبلی رہ چکے ہیں۔
چیف آرگنائزر سیف اللہ خان نیازی سے ملاقات کے بعد اسلام آباد میں منعقدہ شمولیتی تقریب میں تحریک انصاف کا حصہ بننے کا اعلان کرتے ہوئے چودھری عثمان وڑائچ کا کہنا تھا کہ ساتھیوں سمیت پاکستان تحریک انصاف میں شمولیت کا اعلان کرتا ہوں، وزیراعظم عمران خان کے قافلے میں شامل ہوکر خوشی اور فخر محسوس کررہا ہوں اور پاکستان تحریک انصاف کی قیادت اور منشور پر مکمل اعتماد کا اظہار کرتا ہوں۔ ان کا کہنا تھا کہ وزیراعظم عمران خان کی قیادت میں پاکستان انشاء اللہ اقوام عالم میں اپنا مقام حاصل کرے گا۔ چیف آرگنائزر سیف اللہ خان نیازی کا اس موقع پر گفتگو کرتے ہوئے کہنا تھا کہ چودھری عثمان وڑائچ اور ساتھیوں کا تحریک انصاف میں بھرپور خیر مقدم کرتا ہوں، پاکستان تحریک انصاف الحمدللہ ملک کی سب سے بڑی اور توانا جماعت بن چکی ہے، وزیراعظم کے ویڑن کی روشنی میں تحریک انصاف کو جدید سیاسی جماعت کے سانچے میں ڈھال رہے ہیں۔ ان کا کہنا تھا کہ تحریک انصاف کی نچلی ترین سطح تک تنظیم سازی کا عمل جلد مکمل کرلیں گے۔ ان کا مزید کہنا تھا کہ پارٹی میں مشاورت اور اجتماعی فیصلہ سازی کے عمل کو پختہ کررہے ہیں اور مضبوط تنظیمی ڈھانچے کے ذریعے عمدہ گورننس کے حصول میں حکومت کا ہاتھ بٹائیں گے۔ پنجاب کے ڈپٹی سپیکر سردار دوست محمد مزاری،صوبائی وزیر جہانزیب کھچی، پاکستان تحریک انصاف جنوبی پنجاب کے صدر نور خان بھابھہ، مرکزی پنجاب کے صدر اعجاز احمدچوہدری، اورنگزیب کھیچی، جہانزیب کھیچی، راجا ریاض، نذر محمد گوندل، چوہدری اعجاز اسلم، چوہدری ارشاد چوہان اور طارق باجوہ سمیت دیگر بھی اس موقع پر موجود تھے۔
