نیویارک(این این آئی)امریکی شہر نیو یارک میں تعینات بھارتی قونصل جنرل سندیپ چکراورتی نے اعتراف کیا ہے کہ نریندر مودی کی زیرقیادت بھارتی حکومت مقبوضہ کشمیر میں ہندوئوں کی آبادکاری کو یقینی بنانے کے لئے اسرائیل طرز کا ماڈل اپنائے گی۔کشمیرمیڈیاسروس کے مطابق سندیپ
چکرورتی نے یہ اعتراف نیویارک میں کشمیری پنڈتوں اور بھارتیوں کے ایک اجتماع سے تقریر کے دوران کیا ۔ انہو ںنے کہا کہ اگر اسرائیل فلسطینی علاقوں میں اپنے لوگوں کو آباد کر سکتا ہے تو ہم بھی اس کی پیروری کر تے ہوئے کشمیر میں ہندوئوں کو بسا سکتے ہیں۔ نیویارک میں ہونے والی اس تقریب کا انعقاد بھارتی فلمساز ویوک اگنی ہوتری کی 1990کی دہائی کے اوائل میں بے گھر ہونے والے کشمیری پنڈتوں کے بارے میں بنائی جانے والی ایک فلم کے سلسلے میں کیا گیا تھا۔ یاد رہے کہ نریندر مودی کی سربراہی میں قائم بھارتیہ جنتا پارٹی کی فرقہ پرست بھارتی حکومت نے رواں برس پانچ فروری کو بھارتی آئین کی دفعات 370اور 35اے منسوخ کر کے مقبوضہ کشمیر کی خصوصی حیثیت ختم کر دی تھی ۔بھارتی حکومت کے اس غیر قانونی اور یکطرفہ اقدام کا اصل مقصد مقبوضہ کشمیر میں بھارتی ہندوئوں کو آباد کرنا ہے تاکہ یہاں مسلمانوں کی اکثریت کو اقلیت میں تبدیل کیا جاسکے۔
