راولپنڈی (آن لائن)تھانہ نیو ٹاؤن کے علاقے ہولی فیملی ہسپتال کی پارکنگ میں راولپنڈی کے سینئر صحافی پراسرار طور پر جاں بحق ہو گئے اپنی گاڑی میں پائی جانے والی لاش3سے4روز پرانی ہونے کی وجہ سے بوسیدہ ہو چکی تھی جبکہ مرحوم کے جسم پرسبز مائل دھبہ نما چھالے پڑے تھے اطلاع ملنے پر پولیس نے لاش قبضہ میں لے کر پوسٹمارٹم کے لئے ہسپتال منتقل کردی جبکہ مرحوم کی شناخت شفاعت شیخ کے نام سے ہوئی پولیس کو اطلاع ملی کہ ہولی فیملی ہسپتال کی پارکنگ میں موجود 1995ماڈل ہنڈا کار نمبر ایل او ایکس9952میں نعش پڑی ہے پولیس نے گاڑی سے لاش قبضہ میں لی جس کی شناخت 60سالہ شفاعت شیخ سکنہ میڈیا ٹاؤن کے

نام سے ہوئی جن کے جسم پر نیلے اور سبز رنگ کے چھالے نما دھبے تھے اور چہرے کا رنگ بھی تبدیل ہو چکا تھا پولیس کے مطابق لاش 3سے4دن پرانی ہے تاہم ابتدائی طور پر مرحوم کی موت کی وجہ بارے کچھ نہیں کہا جا سکتا پوسٹمارٹم کے بعد ہی اصل صورتحال سامنے آئے گی پولیس نے ہسپتال کے مرکزی دروازے پر تعینات سکیورٹی گارڈز سے پوچھ گچھ کے ساتھ ہسپتال میں لگے سی سی ٹی وی کیمروں کی مدد بھی حاصل کر لی ہے متوفی شفاعت شیخ90کی دہائی سے شعبہ صحافت سے وابستہ تھے اور روزنامہ پاکستان، روزنامہ خبریں اور روزنامہ الاخبار میں بطور کرائم رپورٹر خدمات انجام دیتے رہے متوفی کے پسماندگان میں ایک بیٹی ہے جو میڈیا ٹاؤن کی رہائشی ہے۔