لاہور( این این آئی)وزیر اعلیٰ پنجاب کے سابق ترجمان ڈاکٹر شہباز گل نے کہا ہے کہ دنیا میں لوگ کرپشن کیخلاف نکل رہے ہیں جبکہ مولانا فضل الرحمان پاکستان میں کرپٹ قیادت کو بچانے نکل پڑے ہیں ،کشمیر کاز کو نقصان پہنچانے کیلئے مارچ کو اربوں روپے کی فنڈنگ کہاں سے آئی؟۔ سماجی رابطے کی ویب سائٹ ٹوئٹر پر اپنے بیان میں انہوں نے کہا کہ کیا دین پڑھنے کیلئے مدارس میں آئے بچوں کو سیاسی مقاصد کیلئے استعمال کیا جا سکتا ہے؟۔

سیاسی جدوجہد کا کوئی مقصد ہوتا ہے،مولانا فضل الرحمان کشمیر کاز سے توجہ ہٹانے کیلئے آئے ہیں۔ آزادی مارچ کے لئے اربوں روپے کی فنڈنگ کہاں سے ہوئی ، آپ کو ان سوالات کا جواب دینا پڑے گا ۔ انہوں نے کہا کہ تحریک انصاف نے2014کے دھرنے سے پہلے دھاندلی کے خلاف تمام متعلقہ فورمز پر آواز اٹھائی۔اسی طرح وزیراعظم عمران خان نے پہلے دن ہی حلقے کھلوانے کی پیشکش کی لیکن سب اپوزیشن پارلیمنٹ میں اپنے عہدے لینے پہنچ گئی۔