سہراب گوٹھ(آن لائن) جمعیت علمائے اسلام (ف) کے امیر مولانا فضل الرحمان نے کہا ہے کہ وزیراعظم کے استعفیٰ سے دستبردار نہیں ہوں گے،ہم ان کی طرز حکمرانی تسلیم نہیں کرتے،حافظ حمد اللہ کی شہریت منسوخی کا فیصلہ مضحکہ خیز ہے ،کشمیریوں کی حق خود ارادیت کی منزل تک جدوجہد جاری رہے گی ۔
اتوار کے روز جمعیت علمائے اسلام (ف) کے امیر مولانا فضل الرحمان نے جلسے سے خطاب کرتے ہوئے کہا کہ ہم وزیراعظم عمران خان کے استعفیٰ کے فیصلے سے دستبردار نہیں ہوئے،یہ پاکستان کا حکمران نہیں بلکہ جبر، دھاندلی اور چوری کی بنیاد پر حکمران مسلط ہو گیا ہے، ہم ان کے انتخاب ،نتیجے اور طرز حکمرانی کو تسلیم نہیں کرتے۔انہوں نے کہا کہ حکومت نے حافظ حمد اللہ کی شہریت منسوخ کرکے مضحکہ خیز فیصلہ کیا ،ان کے فیصلوں کا دنیا میں مذاق اڑایا جا رہا ہے ،اس طرح کے فیصلوں پر تحریک انصاف کی حکومت کو شرم آنی چاہیے۔فضل الرحمان نے کہا کہ ہم مشکل گھڑی میں کشمیریوں کیساتھ کھڑے ہیں ،ان کے حق خود ارادیت کی منزل تک یہ سفر جاری رہے گا،او آئی سی اور دیگر عالمی تنظیمں کشمیر میں بھارتی مظالم کا نوٹس لیں ،پاکستانی قوم کشمیریوں پر ڈھائے جانے والے مظالم پر خاموش نہیں رہ سکتی۔انہوں نے کہا کہ کشمیر کے اندر انسانی حقوق کو پامال کیا جا رہا ہے ،کشمیریوں کو خراج عقیدت جنہوں نے جہاد کا علم بلند کیا اور ہندو سامراج کو پیچھے دھکیل دیا۔
