کراچی (این این آئی) فیڈرل بی ایریا میں مدنی مسجد کے باہر ٹارگٹ کلرزکی فائرنگ سے ایک شخص جاں بحق ہوگیا۔ مقتول آصف کچلی تحریک انصاف کا سابق عہدے دار تھا،واقعہ کی اطلاع ملنے پر پولیس اور رینجرز کی بھاری نفری جائے وارادات پر پہنچ گئی ۔
تفصیلات کے مطابق فیڈرل بی ایریا عائشہ منزل پر واقع مدنی مسجد کے باہر موٹرسائیکل سوار ملزمان کی فائرنگ سے مسجد سے نکلنے والا 42سالہ آصف ہارون کچلی موقع پر ہی جاں بحق ہو گیاجبکہ ملزمان فائرنگ کرتے ہوئے فرار ہوگئے۔ واقعہ کی اطلاع ملنے پر عزیزآباد پولیس موقع پر پہنچ گئی جس نے لاش کو عباسی شہید اسپتال منتقل کردیا، مقتول آصف ہارون کچلی تحریک انصاف ضلع وسطی کا سابق نائب صدر بتایا جاتاہے تاہم وہ کچھ عرصہ سے غیر فعال تھااور تبلیغی سرگرمیوں میں مصروف تھا،مقتول عزیر آباد ہی کے محلے صدیق آباد کا رہائشی تھا۔مقتول کو نائن ایم ایم پستول کی دو گولیاں لگی ہیں اور پولیس نے گولیوں کے خول فرانزک لیب بھجوا دیئے ہیں،مقتول پہلے کھارادر میں رہتا تھا اور بعد ازاں حسین آباد منتقل ہو گیا تھا۔،ایس ایس پی سینٹرل راو عارف اسلم کے مطابق مقتول کے بارے میں معلوم ہوا ہے کہ وہ ماضی میں جوئے سٹے اور کرکٹ میچ پر بک چلاتا تھا تاہم واقعہ کی مختلف وجوہات ہو سکتی ہیں اور پولیس واقعہ کی مزید تفتیش کر رہی ہے۔واضح رہے مدنی مسجد تبلغی جماعت کا کراچی میں دوسرا بڑا مرکز ہے جہاں پر فائرنگ کی اطلاع ملتے ہی پولیس اور رینجرز کے افسران کے اعلی افسران موقع پر پہنچ گئے اور پورے علاقے کی ناکہ بندی کردی ۔
پولیس ذرائع کے مطابق ابتدائی تفتیش میں واقعہ ٹارگٹ کلنگ کا لگتاہے تاہم پولیس مسجد کے اطراف میں پوچھ گچھ کے ساتھ سی سی ٹی وی فوٹیج بھی حاصل کرنے کی کوشش کررہی ہے جب کہ جائے وقوعہ سے گولیاں کے خول اکٹھے کر کے فرانزک ٹیسٹ کے لیے بھیج دیے گئے ہیں، آئی جی سندھ نے واقعہ کا نوٹس لیتے ہو ئے ایس ایس سینٹرل سے فوری طور رپورٹ طلب کرلی، انہوں نے ہدایت دی کہ جائے وقوعہ پر اکٹھا شواہد اور عینی شاہدین کے بیانات پر تفتیش کو کامیاب اور نتیجہ خیز بنایا جائے۔ماہر تفتیشی ٹیم مقرر کر کے کیس کو جلد حل کیا جائے اور ملوث ملزمان کی گرفتاری کو یقینی بنایا جائے۔
