اسلام آباد (این این آئی)مولانافضل الرحمن کے آزادی مارچ کے اعلان کے بعد پیپلزپارٹی نے آئندہ ہفتے کور کمیٹی کا اجلاس طلب کرلیا۔ ایک بیان میں چیئرمین بلاول بھٹو زرداری کے ترجمان مصطفی نواز کھوکھر نے کہاکہ چیئرمین بلاول بھٹو زرداری نے مولانا فضل الرحمان کے مارچ کے اعلان کا خیرمقدم کیا ہے۔ انہوں نے کہاکہ دونوں رہنماؤں کا اس نکتے پر اتفاق ہوا ہے کہ اپوزیشن کے پاس احتجاج کے سوا کوئی راستہ نہیں۔
انہوں نے کہاکہ جمہوری پارٹیوں کے پاس اب سڑکوں پر آنے کے علاوہ کوئی راستہ نہیں رہا، حکومت کی ہر محاذ پر ناکامی کے بعد اپوزیشن ملکی مفاد میں ہر صورت اقدامات کرے گی۔ ترجمان بلاول بھٹو نے کہاکہ چیئرمین بلاول بھٹو زرداری نے اگلے ہفتے کور کمیٹی کا اجلاس طلب کرلیا ہے۔ مصطفی نواز کھوکھر نے کہاکہ کور کمیٹی مولانا فضل الرحمان کے مارچ میں شرکت کے حوالے سے اہم فیصلے کرے گی۔
