اسلام آباد(آئی این پی)پاکستان تحریک انصاف نے سابق وزیر صحت عامر محمود کیانی کیخلاف نیب میں انکوائری سے متعلق افواہوں کی تردید کی ہے۔پی ٹی آئی سیکرٹری اطلاعات جواد احمد نے کہا ہے کہ میڈیا میں عامر محمود کیانی کیخلاف نیب کی کارروائی کا جھوٹا تاثر دیا گیا۔
5ماہ پرانی پریس ریلیز کے بل بوتے پر نئے سرے سے تحریک انصاف کے سیکرٹری جنرل کو جھوٹی مہم کا نشانہ بنانے کی کوشش کی گئی، آزادء اظہار پر کسی قسم کی قدغن گوارا نہیں مگر اس آزادی کے نام پر پگڑیاں اچھالنے کی بھی اجازت نہیں دی جاسکتی۔ اپنے ایک بیان میں پاکستان تحریک انصاف کے مرکزی سیکرٹری اطلاعات احمد جواد نے کہا کہ میڈیا کے بعض حلقوں کی جانب سے عامر محمود کیانی کیخلاف نیب کی کارروائی کا جھوٹا تاثر دیا گیا، چیئرمین کی صدارت میں یکم اکتوبر کے اجلاس کے اعلامیے میں عامر محمود کیانی کا ذکرہے نہ کوئی نشان، 5ماہ پرانی پریس ریلیز کے بل بوتے پر نئے سرے سے تحریک انصاف کے سیکرٹری جنرل کو جھوٹی مہم کا نشانہ بنانے کی کوشش کی گئی۔انہوں نے کہا کہ خبر کی اشاعت سے پہلے حقائق معلوم کئے گئے نہ ہی عامر محمود کیانی کا موقف حاصل کیا گیا،یکطرفہ طور پر بے بنیاد پراپیگنڈہ مہم پیمرا قوانین اور صحافتی اقدار کی کھلی خلاف ورزی ہے، اس شرمناک پراپیگنڈہ مہم میں معاونت کے مرتکب افراد کیخلاف پمرا شکایات کونسل سے رجوع کرنے کا فیصلہ کیا ہے، ذمہ داروں کو اپنے اس مجرمانہ اقدام کا جواب دینا ہوگا۔
