اسلام آباد(آن لائن) وزیراعظم عمران خان کے اقوام متحدہ کی جنرل اسمبلی سے خطاب پر مسلم لیگ ن کے رہنماء مشاہد حسین سید بھی تعریف کئے بغیر نہ رہ سکے۔گزشتہ روز وزیر اعظم کے خطاب پر تبصرہ کرتے ہوئے انہوں نے کہا کہ وزیر اعظم کی تقریر ایک حقیقی پاکستانی کی تقریر تھی اور یہ وقت کی ضرورت تھی۔وزیر اعظم نے بہت ہی موثر انداز میں کشمیر کامقدمہ بھی پیش کیا اور نریندرمودی کا فاشسٹ چہرہ بھی بے نقاب کیا۔
مشاہد حسین سید جو سینیٹ امور خارجہ کمیٹی کے چیرمین بھی ہیں،نے ایک نجی ٹی وی کو انٹرویو میں کہا کہ وزیر اعظم نے بلاشبہ اچھی تقریر کی ہے اور اس میں اسلام فوبیا سے لیکر کشمیر تک بھرپور طریقے سے بات کی گئی ہے اور میں سمجھتا ہوں کہ ٹرمپ کا مودی کی جلسے میں شرکت پاکستان کیلئے بہت نیک شگون ثابت ہوئی ہے کیونکہ اس جلسہ میں خود مودی ٹرمپ کے سامنے بے نقاب ہوا۔کشمیریوں کو سپورٹ ہم پہلے بھی کررہے تھے لیکن اب بحیثیت قوم ہم نے فیصلہ کیا ہے کہ ہرحا ل میں کشمیریوں کا ساتھ دینگے اور وزیر اعظم کی تقریر اس سلسلے کی ایک کڑی تھی،اب امریکہ کے موقف میں تبدیلی آرہی ہے اور امریکہ کی طرف سے مودی کو کہا گیا ہے کہ مسئلہ کشمیر کو حل کیا جائے مودی کے اقدام سے ہندوستان کے عوام بھی تقسیم ہوگئے ہیں۔ دریں اثناء وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیر اعظم نے اقوام متحدہ کی جنرل اسمبلی میں بھارت کا سیاہ چہرہ بے نقاب کیا۔ وزیر اعظم نے کہا کہ ہم امن اور قانون کی بالا دستی چاہتے ہیں۔ گزشتہ روز ایک بیان میں معاون خصوصی نے وزیراعظم عمران خان کے اقوام متحدہ میں خطاب کے حوالے سے کہا کہ وزیراعظم عمران خان نے دنیا کو پیغام دیا کہ حق والے باطل کے سامنے نہیں جھکتے، وزیراعظم نے باور کرایا کہ اقوام متحدہ کے قوانین حرکت میں آنے چاہیں۔ عمران خان پوری دنیا کے لیڈر بن کر سامنے آئے۔ آج عمران خان نے اسلامی شناخت کا تحفظ کیا ہے۔
وزیراعظم نے بتایا کہ انسانی حقوق کیا ہیں، اسلام اصل میں کیا کہتا ہے.جبکہ پاکستان کے دو سابق وزراء خارجہ خورشید قصوری اور حناربانی کھر نے کہا ہے کہ وزیر اعظم عمران خان نے عالمی فورم پر بھرپورنمائندگی کی ہے۔سابق وزیرخارجہ خورشید قصوری نے کہاکہ وزیراعظم نے ایک غیرمعمولی تقریر کرکے سب کو حیران کردیاہے اور حیرانگی کی بات تو یہ ہے کہ انہوں نے یہ تقریر فی البدیہہ کی اور تمام پہلوؤں کا احاطہ کیا۔خورشید قصوری نے کہا کہ میں سمجھتا ہوں کہ اس سے بہتر خطاب نہیں ہوسکتا
انہوں نے تمام عالمی ایشوز کو اٹھانے کے ساتھ ساتھ مسئلہ کشمیر کا معاملہ بھی انتہائی خوبصورتی سے پیش کیا اور یہ تاثر دور کرنے میں وہ کامیاب رہے ہیں کہ پاکستان ایٹمی جنگ کی دھمکی دے رہا ہے۔وزیراعظم نے بہت ہی احسن اندازسے کشمیر کے معاملے کے تمام پہلوؤں کو عالمی دنیا کے سامنے کھولا ہے اور دنیا کو بتایا ہے کہ نریندرمودی کے اقدامات سے کیاکیا ہوسکتاہے۔انہوں نے کہا کہ وزیر اعظم نے خطاب میں مہاتما گاندھی کو عظیم لیڈر کہہ کر ہندوستان کی توجہ بھی حاصل کی ہے۔سابق وزیر خارجہ حناربانی کھر نے کہا کہ وزیر اعظم اقوام متحدہ کے فورم پر ایسے بولے جیسا کہ بولنا چاہئیے تھا۔ مسئلہ کشمیر پر اور اسلامی دہشت گردی کیخلاف انکی تقریر بہت اچھی تھی۔
