مظفر آباد (این این آئی)وزیر اعظم آزادجموں وکشمیر راجہ محمد فاروق حیدرخان نے کہا ہے کہ بھارت جموں وکشمیر کے عوام کو آپس میں لڑانا چاہتا ہے،ہمیں کسی فکری اور نظریاتی انتشار کا شکار نہیں ہونا،دشمن ہمیں تقسیم کرنا چاہتا ہے،ہم وزیراعظم عمران خان کی کال کے منتظر ہیں،مقبوضہ کشمیر کی خصوصی حیثیت تبدیل کر کے بھارتی حکومت مہاجر ہندوؤں کو اسٹیٹ سبجیکٹ دیکر وہاں آبادی کا تناسب تبدیل کرنا چاہتی ہے۔

سلامتی کونسل کی مسئلہ کشمیر پر گیارہ قراردادیں موجود ہیں۔کانگریس ہندوستان کا چہرہ اور بی جے پی اس کا دماغ ہے۔آر ایس ایس کی آئیڈیالوجی سے دنیا کے امن کو شدید خطرہ ہے۔ ان خیالات کا اظہار انہوں نے دارلحکومت میں جماعت اسلامی زیر زاہتمام یکجہتی کشمیر جلسہ سے خطاب کرتے ہوئے کیا۔ اس موقع پر امیر جماعت اسلامی سینیٹر سراج الحق و دیگر نے بھی خطاب کیا۔ وزیر اعظم نے کہا کہ اس جلسے کے اردگرد 800 لوگوں تحریک آزادی کشمیر کے مجاہدوں کی قبریں ہیں۔ وزیر اعظم نے کہاکہ کشمیری صرف رائے شماری کا مطالبہ کرتے ہیں۔بھارت طاقت کے بل بوتے پر ان کو دبانے کی ناکام کوشش کررہا ہے۔ کشمیریوں کے دلوں سے موت کا خوف ختم ہو چکا ہے،وہ 8لاکھ سے زائد قابض افواج کا مقابلہ کررہے ہیں۔ انہوں نے کہاکہ ہم وزیر اعظم پاکستان عمران خان کی کال کے منتظر ہیں،ہم اس انتظار میں ہیں کہ آج وہ کیا مقدمہ پیش کرتے ہیں۔ریاستی باشندوں کو آرپار جانے کے لیے کوئی پابندی نہیں ہے۔آزادکشمیر کے عوام خونی لکیر کو ختم کرنا چاہتے ہیں۔انہوں نے کہاکہ بھارت مقبوضہ کشمیر میں نسل کشی کے منصوبے پر عمل پیرا ہے۔ وہاں کی ڈیمو گرافی تبدیل کرنے کی کوشش کی جارہی ہے۔ کشمیری تمام تر بھارتی اوچھے ہتھکنڈوں کو ناکام بنائیں گے۔پاکستان و آزادکشمیر کے عوام ان کی پشت پر ہیں۔ ہم اپنے بھائیوں کیلئے کسی قربانی سے دریغ نہیں کرینگے۔ انہوں نے کہاکہ پاکستان ہی کشمیریوں کا موثر وکیل اور امیدوں کامرکز ہے، مقبوضہ کشمیر کے عوام پاکستان کی طرف دیکھ رہے ہیں۔