لاہور( آن لائن )قومی ٹیم کے کپتان شاہد آفریدی نے وزیر اعظم عمرا ن خان کی جانب سے دنیا کے سامنے اسلام کا درست چہرہ پیش کرنے پر انہیں خراج تحسین پیش کیا ۔سوشل میڈیا ویب سائٹ ٹویٹر پر اپنے پیغام میں شاہد آفریدی نے لکھا کہ وزیر اعظم عمران خان نے کتنی خوبصورتی کے ساتھ اسلام کی
خوبیوں کو دنیا کے سامنے پیش کیا جن پر ہمارے نبیﷺ نے نہ صرف خود زندگی گزاری بلکہ عملی مظاہرہ بھی کرکے دکھایا،انسانیت ہر چیز سے اوپر ہے،یہ اقوام متحدہ کی آنکھیں کھولنے کے لیے کافی ہونا چاہیے،اللہ اس شخص پر رحم نہیں کرتا جو لوگوں پر رحم نہ کرے(صحیح بخاری و مسلم )۔واضح رہے کہ رواں برس نیوزی لینڈ کے شہر کرائسٹ چرچ کی مساجد میں ہونے والے فائرنگ کے حملے کو وزیراعظم عمران خان نے اسلاموفوبیا کا نتیجہ قرار دیا تھا جس میں 9 پاکستانیوں سمیت 51 افراد شہید ہوئے تھے۔اس کے علاوہ دنیا کے مختلف ممالک میں مساجد اور اسلام کے نام پر دیگر حملوں کے واقعات میں بھی اضافہ ہوا ہے جس کے نتیجے میں انتہاپسندی بڑھتی جارہی ہے۔یاد رہے کہ رواں برس مارچ میں ملائیشیا کے وزیراعظم مہاتیر محمد کے دورہ پاکستان کے دوران وزیراعظم عمران خان کا کہنا تھا کہ اسلامو فوبیا نے مسلم امہ کو نقصان پہنچایا، دہشت گردی نے مسلم ممالک کو بہت متاثر کیا۔ دنیا میں جان بوجھ کر اسلامو فوبیا کو ترغیب دی گئی۔ اس موقع پر مہاتیر محمد کا کہنا تھا کہ اسلامو فوبیا کے خاتمیکے لیے مسلم ممالک کو مشترکہ کوششیں کرنا ہوں گی۔
