فیصل آباد ( آن لائن )چائنا پاکستان اقتصادی راہداری کے تحت فیڈمک کے علامہ اقبال انڈسٹریل سٹی فیصل آباد میں 3217ایکڑ رقبہ پر بننے والے سپیشل اکنامک زون کا افتتاح کی حتمی تاریخ کا اعلان جلد کر دیا جائے گا تاہم مذکورہ افتتاحی تقریب دسمبر میں منعقد ہونے کا امکان ہے۔فیصل آباد انڈسٹریل سٹیٹ ڈویلپمنٹ اینڈ مینجمنٹ کمپنی کے چیئر مین میاں کاشف اشفاق نے بتایاکہ اس سلسلہ میں ان کی جہانگیر خان ترین اور دیگر حکام سے ملاقات ہو چکی ہے۔انہوںنے بتایاکہ وزیر اعظم عمران خان فیڈمک کے مختلف پراجیکٹ کے حوالے سے ہونے والی پیشرفت

سے مکمل طور پر آگاہ ہیں۔انہوںنے بتایاکہ فیڈمک کا یہ پراجیکٹ 3217 ایکڑ رقبہ پر مشتمل اور پنجاب کا واحد اکنامک زون ہے جو سی پیک کے تحت ترجیحی بنیادوں پر تیار کیا جا رہا ہے۔ انہوںنے کہا کہ مذکورہ اکنامک زون میں سرمایہ کاری کرنے والی چینی کمپنیوں کی تعداد 50 سے زائد ہے جبکہ اگلے سال تک اس کنامک زون میں سرمایہ کاری کرنے والی چینی کمپنیوں کی مجموعی تعداد 150 سے بھی تجاوز کر جائے گی جس سے جہاں روز گار کے ہزاروں نئے مواقع پیدا ہوں گے وہیں ملک کو معاشی استحکام سے ہمکنار کرنے میں بھی مدد ملے گی ۔