اسلام آباد (این این آئی)وزیر داخلہ اعجاز شاہ کی جانب سے ریسکیو آپریشن کے لئے ہائی الرٹ کی ہدایت کی گئی ہے۔ منگل کو جاری ایک بیان میں انہوں نے سول سائیڈ سے آزاد کشمیر انتظامیہ اور آرمی کے ساتھ مکمل تعاون کی ہدایت کی۔ انہوں نے کہاکہ کسی بھی قسم کی ناگہانی آفت سے نمٹنے کیلئے اسلام آباد انتظامیہ اور ادارے ہائی الرٹ رہیں۔ انہوں نے طبی امداد اور میڈیکل سہولیات کا جائزہ لینے کی ہدایت کی۔ آزاد کشمیر سمیت ملک بھر میں زلزلے کے بعد منگلا ڈیم بند ہونے سے 900 میگاواٹ بجلی سسٹم سے نکل گئی۔

واپڈا ذرائع کے مطابق جس وقت زلزلہ آیا 900 میگاواٹ بجلی پیدا ہو رہی تھی، منگلا ڈیم بند ہونے سے 900 میگاواٹ بجلی سسٹم سے نکل گئی۔ذرائع نے بتایا کہ 900 میگاواٹ شارٹ فال سے مختلف شہروں میں بجلی کی لوڈشیڈنگ بڑھنے کا خدشہ ہے اور بجلی گھر کی بندش کے باعث لوڈشیڈنگ میں 3 سے4 گھنٹے کا اضافہ ہوسکتا ہے۔ زلزلے کے جھٹکوں کے باعث میرپور میں ریڈیو پاکستان کی عمارت کو بھی نقصان پہنچا، ملازمین نے نشریات کھلے آسمان تلے جاری رکھیں۔ منگل کو آزاد کشمیر اور پاکستان کے مختلف شہریوں میں زلزلے کے شدید جھٹکے محسوس کئے گئے جس سے بڑے پیمانے پر جانی و مالی نقصان ہوا۔سابق ڈی جی ریڈیو پاکستان مرتضی سولنگی کے مطابق میرپور میں واقع ریڈیو پاکستان کی عمارت کو نقصان پہنچا اور ملازمین نے نشریات کا سلسلہ کھلے آسمان تلے جاری رکھا۔قومی ڈیزاسٹر مینجمنٹ اتھارٹی نے اپنے ماتحت صوبائی ڈیزاسٹر مینجمنٹ اتھارٹیز کو ہر ممکنہ حفاظتی تدابیر لینے کے احکامات جاری کر دئیے ہیں۔جاری بیان میں عوام سے کہاگیاکہ اس وقت آزاد کشمیر میں اگر آپ کو کسی قسم کی امداد کی ضرورت ہے یا آپ یہ جاننا چاہتے ہیں کہ کیسے محفوظ رہ سکتے ہیں تو ایسی صورت میں ان نمبرز پر رابطہ کر سکتے ہیں۔مشتاق منہاس، وزیر اطلاعات آزاد کشمیر03315450001،قیصر اورنگزیب، ڈی سی میرپور 03015035424،ڈاکٹر اعظم، ڈی سی کوٹلی 05826920763،محمد طیب، ڈویڑنل کمشنر 03004106967،کرنل علاؤالدین، ڈائریکٹر ڈزاسٹر رسپونس 03311131313،کیپٹن سید عماد عابد، ایس ایس پی جہلم 03009521434،پولیس کنٹرول روم جہلم 05449270057،ڈی پی او آفس جہلم 05449270042 اور ڈی پی او دفتر گجرات 0539260026 شامل ہیں۔