کراچی(آن لائن) سندھ حکومت کے ترجمان مشیر قانون ، ماحولیات و ساحلی ترقی بیرسٹر مرتضی وہاب نے کلین کراچی مہم کا پول کھول دیا بیرسٹر مرتضی وہاب نے کلین کراچی مہم کے تحت نالوں سے کچرا اْٹھا کر سمندر کنارے پھینکے جانے سے متعلق ویڈیو ثبوت پیش کردئیے۔
اپنے بیان میں ترجمان سندھ حکومت کا کہنا تھا کہ سی ویو چائنا پورٹ اور امریکن قونصلیٹ کے سامنے بڑی مقدار میں کچرا ڈمپ کیا جارہا ہے جو نالوں سے اْٹھا کر ان علاقوں میں پھینکا جارہا ہے سی ویو، امریکن قونصل خانے کے سامنے سمیت دیگر مقامات پر کچرا پھینکنے سے شہر میں مکھیاں اور مچھر پیدا ہورہے ہیں۔بیرسٹر مرتضی وہاب نے کہا کہ خدارا کراچی کے شہریوں کے ساتھ یہ ظلم اور ناانصافی بند کی جائے نالوں کی صفائی کے نام پر چندہ وصول کیا جارہا ہے لیکن صفائی نہ ہونے کے برابر ہے وفاق کو کراچی کا درد ہے تو کم از کم اپنے فنڈز کا استعمال کرے یہ کیسی مہم ہے کہ جس میں شہریوں سے پیسے بھی بٹورے جارہے ہیں انہوں نے کہا کہ خدارا منفی سیاست ترک کرکے کچرا اور نالے صاف کرنے میں صوبائی اور مقامی حکومتوں کا ساتھ دیں نالوں کا کچرا سمندر کنارے پھینکنے سے شہر اور شہریوں کی خدمت نہیں ہورہی بلکہ اْلٹا انکے ساتھ زیادتی ہورہی ہے۔ بیرسٹر مرتضی وہاب نے کہا کہ ہم کسی کے خلاف نہیں لیکن شہر کے ساتھ یہ کھلواڑ نہیں ہونا چاہئیے۔ اچھا ہوتا کہ سب ملکر اس شہر سے گندگی اور کچرا صاف کرتے مگر سندھ حکومت کو نیچا دکھانے کی دوڑ میں بعض ناعاقبت اندیش جھوٹ اور الزام تراشی کی سیاست کا سہارا لے رہے ہیں جو اپنے مزموم مقاصد میں ناکام ہونگے۔
