لاہور(این این آئی) ترجمان وزیراعلی پنجاب ڈاکٹر شہباز گل نے کہا ہے کہ رانا ثنا اللہ پر منشیات کے مبینہ کاروبار کے سنگین الزامات ہیں،عدلیہ آزاد اور ادارے خود مختار ہیں، مریم اورنگزیب عدلیہ پر بیانات داغ کر اداروں پر انگلی اٹھانا بند کریں۔اپنے ایک بیان میں ڈاکٹر شہباز گل نے کہاکہ عدالتوں میں دوران سماعت ججز کی تبدیلی معمول کا معاملہ ہے۔ مریم اورنگزیب شاید بھول گئی ہیں ججز پر دبا ڈالنا ن لیگ کا وطیرہ رہا ہے۔ عوام

جانتے ہیں کہ من پسند فیصلے لینے کے لیے ججز کو کون فون کرتا تھا۔انہوں نے کہاکہ حال ہی میں کیلبری کوئین جج کو بلیک میل کرنے کے لیے متنازع ویڈیو بنا لائیں۔ تاریخ گواہ ہے کرپٹ لیگ عدالت عظمی پر حملہ آور ہوئی۔انہوں نے کہا کہ متعلقہ ادارے تمام ضروری شواہد عدالت میں جمع کروا رہے ہیں۔ مریم اورنگزیب جج اینڈ جیوری نہ بنیں، عدلیہ کو اپنا کام کرنے دیں۔ منفی پراپیگنڈہ کرنے کی بجائے بے گناہی کے ثبوت عدالت میں دیں۔