لاہور(این این آئی)پاکستان پیپلز پارٹی پنجاب کے جنرل سیکرٹری چوہدری منظور احمد نے کہا ہے کہ جب کشمیر کاز کیلئے ملک میں اتحاد اور یکجہتی کی ضرورت ہے حکومت ملک میں انتشار پھیلا رہی ہے،مقبوضہ کشمیر میں نازک صورتحال کے دوران اپوزیشن کے خلاف احتساب کے نام پر انتقامی کارروائیوں کا عمل تیز کیا گیا، اس وقت آصف زرداری کی صحت ٹھیک نہیں، آصف زرداری کو کمر درد اور بلڈ پریشر کا مسئلہ ہے، جیل انتظامیہ کو چاہیے کہ وہ عدالتی احکامات پر عمل کرے۔

پارٹی سیکرٹریٹ ماڈل ٹاؤن میں چوہدری اسلم گل،زوہیب بٹ اور الطاف قریشی کے ہمراہ پریس کانفرنس کرتے ہوئے انہوں نے کہا کہ وزیراعظم نے مایوس کن تقریر کی، حکومت نے ابھی تک اقوام متحدہ، یورپی یونین اور او آئی سی کے لئے کوئی وفد نہیں بھجوایا۔ حکومت نے ایک سال میں 10 ہزار ارب کا قرضہ لیا، پیپلزپارٹی نے 5 سال کے دوران 6 ہزار ارب کا قرضہ لیا تھا۔حکومت نے ایمنسٹی اسکیم کے ذریعے این آر او دیا،خیبر پختوانخواہ میں 17 انکوائریاں زیر التوا ہیں، خیبر پختوانخواہ حکومت کے ذمہ داران کو کیوں گرفتار نہیں کیا جاتا،ملک میں فاشزم کی 14 نشانیاں پوری ہو چکی ہیں۔ انہوں نے کہا کہ انسانی تاریخ کا بڑا المیہ کشمیر میں جنم لے چکا ہے، 23 دنوں میں حکومت 23 وزرائے خارجہ سے بھی بات نہیں کر سکی، وزیراعظم قوم کو بتائیں کشمیر کے معاملے پر دنیا سے کیوں رابطہ نہیں کیا گیا،حکومت کو کشمیر کے معاملے پر مشترکہ پارلیمانی وفود ترتیب دینے چاہیے تھے۔ انہوں نے کہاکہ صدر مملکت نے غیر آئینی طور پر الیکشن کمیشن کے دو ارکان کا تقرر کیا،غیر آئینی اقدام سے ملک میں آئینی بحران پیدا ہوا، اپوزیشن کو چاہیے مشترکہ اجلاس میں صدر عارف علوی کی تقریر کا بائیکاٹ یا شدید احتجاج کرے۔