صنعاء (این این آئی)یمن میں آئینی حکومت کو سپورٹ کرنے والے اتحاد کی فورسز کے سرکاری ترجمان کرنل ترکی المالکی نے کہاہے کہ اتحاد کی مشترکہ قیادت (شبوہ) صوبے میں تمام فریقوں کی جانب سے فائر بندی پر مستقل طور پر عمل پیرا ہونے کی اہمیت کو باور کراتی ہے۔

میڈیارپورٹس کے مطابق کرنل المالکی نے واضح کیا کہ اتحاد کی مشترکہ فورسز کی کمان شبوہ صوبے میں زمینی صورت حال کا مسلسل جائزہ لے رہی ہے۔ انہوں نے بتایا کہ اس سلسلے میں سعودی عرب اور امارات کی ایک مشترکہ کمیٹی بھی تشکیل دی گئی ہے ۔ کمیٹی حالات و واقعات کی درستی کے علاوہ (شبوہ اور اَبین) صوبوں میں فائر بندی کو مستحکم بنانے اور عدن صوبے میں تمام کوششوں اور اقدامات کی تکمیل کے لیے کام کرے گی۔اتحادی فورسز کے ترجمان نے تمام فریقوں سے مطالبہ کیا کہ وہ دانش مندی کا مظاہرہ کرتے ہوئے قومی مفاد کو ترجیح دیں اور یمن میں انارکی اور شورش کی آگ بھڑکانے والی ایران نواز دہشت گرد حوثی ملیشیا اور دیگر تخریب کار تنظیموں کو مواقع فراہم نہ کریں۔اس حوالے سے سعودی عرب کی وزارت خارجہ اور متحدہ عرب امارات میں خارجہ امور اور بین الاقوامی تعاون کی وزارت نے ایک مشترکہ بیان بھی جاری کیا ۔ بیان میں یمن کے عبوری دارالحکومت عدن شہر کے علاوہ ابین اور شبوہ صوبوں میں جنم لینے والی صورت حال پر گہری تشویش کا اظہار کیا گیا ہے۔ دونوں ملکوں نے اتحادی ممالک کی جانب سے یمن میں سیاسی، عسکری، امدادی اور ترقیاتی کوششیں جاری رکھنے کا عزم ظاہر کیا۔ سعودی عرب اور امارات کی حکومتوں نے باور کرایا کہ اتحادی فورسز کی کمان کی جانب سے تشکیل دی گئی مشترکہ کمیٹی کے ساتھ تعاون اور پاسداری کی ضرورت ہے۔

موضوعات:یمن،سعودی عرب،یو اے ای