کوئٹہ(نیوزڈیسک)پاکستان ریلویز نے 9جون سے کوئٹہ سے زاہدان روٹ پر مال بردار ٹرین چلانے کا فیصلہ کرلیا جبکہ گوادر۔کاشغر راہداری منصوبے کے حوالے سے گوادر میں ریلوے اسٹیشن اور یارڈ کی تعمیر کےلئے اراضی حاصل کرلی گئی ہے۔یہ بات بدھ کو ریلوے ڈویڑنل سپرنٹنڈنٹ فیض محمد بگٹی نے کوئٹہ میں صحافیوں سے بات چیت کرتے ہوئے کہی ان کا کہنا تھا کہ کوئٹہ زاہدین مال بردار ٹرین میں تاجروں کو خصوصی رعایت دی جائے گی انہوں نے بتایا کہ سولہ ڈبوں پر مشتمل یہ ٹرین ہر ہفتے بلاناغہ چلے گی اور اس سے ہر ماہ 32لاکھ روپے آمدنی متوقع ہے۔فیض محمد بگٹی نے مزید بتایا کہ گوادر۔کاشغر راہداری منصوبے کے حوالے سے گوادر میں ریلوے اسٹیشن اور یارڈ کی تعمیر کےلئے اراضی خریدی گئی ہے،،3سو ایکڑ اراضی کےلئے بلوچستان حکومت کو 45کروڑ روپے کی ادائیگی کردی گئی ہے، مزید اراضی کے حصول کےلئے بھی صوبائی حکومت سے بات چیت جاری ہے، فیض محمد بگٹی کا یہ بھی کہنا تھا کہ سبی۔ ہرنائی سیکشن کی بحالی کےلئے آئندہ مالی سال کے بجٹَ میں فنڈز مختص کئے جائیں گے بوستان۔ ڑوب ریلوے ٹریک کی بحالی کا منصوبہ بھی زیرغور ہے۔