اسلام آباد (این این آئی)پاکستان مسلم لیگ (ن) کی ترجمان مریم اورنگزیب نے وزیراعظم کے قوم سے خطاب کے سینسر ہونے کا انکشاف کرتے ہوئے کہاہے کہ عمران صاحب اللہ کی لاٹھی بے آواز ہوتی ہے، بغض اور جھوٹ پر مبنی بیان کے ساتھ وہی ہوتا ہے جو رات کو ہوا،عمران صاحب جب قومی اداروں پر عدم اعتماد کریں گے اور دوستوں کو نوازیں گے تو نتیجہ رات والا نکلے گا،ایڈیٹنگ کی بناء پر قوم سے خطاب میں تاخیر کا ملبہ پی ٹی وی ملازمین کے سرتھونپنا قابل مذمت ہے۔

ایک بیان میں انہوں نے کہاکہ عمران صاحب اس دوست کا نام بتائیں جس نے وزیراعظم کے باوقار منصب کو پوری دنیا میں مذاق بنادیا۔ انہوں نے کہاکہ جتنے لائیو، ریکارڈڈ یا ایڈیٹڈ جھوٹے بیان دیں، آئی ایم ایف کا عوام دشمن بجٹ واپس لینا پڑے گا۔انہوں نے کہاکہ عمران صاحب! نے جیسے بے ربط خطاب کیا، معیشت اور ملک کے ساتھ بھی یہی کررہے ہیں۔انہوں نے کہاکہ عمران صاحب جب قومی اداروں پر عدم اعتماد کریں گے اور دوستوں کو نوازیں گے تو نتیجہ رات والا نکلے گا۔انہوں نے کہاکہ سلیکٹڈ ہی سہی لیکن وزیراعظم کے قوم سے بے ربط اور ’سینسرڈ‘ خطاب نے پاکستان کی جگ ہنسائی کرائی۔ انہوں نے کہاکہ عمران صاحب کے قوم سے خطاب میں ان کی آواز باربار بند کرنے کے ذمہ دار اْن کے قریبی دوست نکلے۔انہوں نے کہاکہ پہلے ایک دوست کے چینل کے ذریعے چئیرمین نیب کے بارے میں ٹیپ چلائی گئی تھی۔ انہوں نے کہاکہ اب ایک دوست کے ذریعے جعلی وزیراعظم کا خطاب سینسر کرایا گیا،وزیراعظم کے خطاب کی ریکارڈنگ اور ایڈیٹنگ نجی کمپنی سے ہوئی تو ملبہ غریب سرکاری ملازمین پر کیوں پھینکا جارہا ہے؟۔ انہوں نے کہاکہ سسٹم سے ہم آہنگ نہ ہونے والے کیمروں سے ریکارڈنگ ہوئی تو سرکاری عملے کا کیا قصور ہے؟۔ انہوں نے کہاکہ ایڈیٹنگ کی بناء پر قوم سے خطاب میں تاخیر کا ملبہ پی ٹی وی ملازمین کے سرتھونپنا قابل مذمت ہے۔ انہوں نے کہاکہ تکنیکی خرابی کی ذمہ داری وزیراعظم کے دوست کے بجائے سرکاری ملازمین پر ڈالنا افسوسناک ہے۔ انہوں نے کہاکہ معاون خصوصی سمیت وزیراعظم کی میڈیا ٹیم بھی سسٹم کے بارے میں ناواقف نکلی۔ انہوں نے کہاکہ عمران صاحب نے ضد کرکے بے ربط خطاب نشر کروایا جو اختیارات کا ناجائز استعمال ہے اس ضد، تکبر اور انا پرستی کی وجہ سے ملک اور قوم کا مذاق بن چکا ہے۔انہوں نے کہاکہ عمران صاحب کا تکنیکی فالٹ پر غصہ معاون خصوصی اور میڈیا ٹیم پر نکالنا ان کی فرسٹریشن کی عکاسی ہے۔