لاہور( این این آئی)پاکستان مسلم لیگ (ن) پنجاب کے صدر رانا ثنااللہ خان نے کہا ہے کہ فردوس باجی شہباز شریف صاحب آ گئے ہیں ، اب آپ کی جانیاں ہی جانیاں ہوں گی ، شہباز شریف کے آنے کے بعد گو عمران گو اور چھپو چھپو بنی گالہ میں چھپو کے نعروں کی تیاری کریں۔

معاون خصوصی فردو س عاشق اعوان کے بیان پر اپنے رد عمل میں انہوں نے کہا کہ عمران صاحب نے ملک کو تباہ کر دیا ، عوام کے منہ سے روٹی چھین لی ، روزگار چھین لیا ، فردوس باجی اکنامک سروے رپورٹ دیکھیں ،عمران صاحب مرہم نہیں، زخم دے کر نمک چھڑک رہے ہیں ۔ انہوں نے کہا کہ فردوس باجی اللہ سے ڈریں آپ کے چہرے پر شہباز شریف کا خوف، اپنی نالائقی اور چوری کا ڈر عیاں ہے ، اب سارے ٹولے کے جانے کا وقت قریب ہے ،فردوس باجی شہباز شریف کے آنے پہ اتنی جو تقریر کی ہے ، سرکاری بسوں اور دوائیوں کی کرپشن کا جواب بھی دے دیتیں ۔آپ کے نئے باس پہلی سال ہی تمام مضامین میں منفی کارکردگی کے ساتھ فیل ہو گئے ہیں ، اس کا جواب دینا آپ کا کام ہے ۔نالائق اعظم نتھیا گلی میں کیا کر رہا ہے اور یہاں آئی ایم ایف اپنی مرضی کا بجٹ بنا رہا ہے ۔ انہوں نے کہا کہ کارکنوں کو جتھہ کہنا ان کی توہین ہے کیونکہ آپ کو اور آپ کے ووٹ چور نئے باس کو کیا پتہ کارکنوں کا پیار کیا ہوتا ہے ۔فردوس باجی عمران نیازی اپنے بنائے ہوئے اہداف میں فیل ہو گیا ہے ، اب شہباز شریف کے سوالوں کے جوابوں کی تیاری کرائیں۔