لاہور(این این آئی) مسلم لیگ(ن) کی نائب صدر مریم نواز نے کہا ہے کہ حکومتی احکامات کی بجائے آئین اور قانون کے مطابق فیصلے کرنے والے ججز کو ایک کر ایک ہٹایاجارہاہے۔ سماجی رابطے کی ویب سائٹ ٹویٹر پرا پنے بیان میں انہوں نے کہاکہ اعلی عدلیہ کے تین معزز جج صاحبان کے خلاف
ریفرنس جعلی حکومت کا ایک اور آمرانہ اور خوف پر مبنی اقدام ہے،حق و انصاف کی ہر آواز کو کچلنے کا جو سلسلہ اسلام آباد ہائیکورٹ کے ایک جج سے شروع ہوا وہ آج ظلم و جبر کی نئی سطح تک آن پہنچا ہے۔ ایمانداری اور دیانتداری کو جرم ٹھہرانا شرمناک ہے۔باکرداراورشفاف شہرت کے حامل ججوں پر سوچی سمجھی سازش کے تحت جعلی حکومت کے حملوں کی مسلم لیگ (ن) بھرپور مزاحمت کرے گی۔انہوں نے کہاکہجعلی اور ووٹ چور حکومت کے منہ پر ایک طمانچہ جس کی گونج دور دور تک سنائی دے گی۔انہوں نے کہاکہ موجودہ نااہل حکومت ہی اداروں کی بدنامی کا باعث ہے۔ہر ادارے کی ساکھ کو ناقابل تلافی نقصان پہنچا کر نالائق اعظم کی حکومت نے ملک کو شدید خطرات سے دو چار کر دیا ہے۔انصاف کی کوئی شمع جلنے بھی دیں تاکہ عوام ریاستی انصاف سے مزید مایوس نا ہوں۔ا نہوں نے کہاکہ وکلا برادری،دانشوروں،سول سوسائٹی،میڈیا اور سیاسی جماعتوں کو عدلیہ پر اس دہشت گردانہ حملے کے خلاف وہی کردار ادا کرنا چاہیے جو انہوں نے ایک ڈکٹیٹر کے ایسے ہی اقدام کے خلاف کیا تھا۔
