اسلام آباد(این این آئی)ملک بھر میں سیاحت کے شوقین افراد کیلئے اچھی خبر آگئی ،سیرو تفریح کے دوران نجی ہوٹلز کو مہنگے کرائے کی ادائیگی نہیں کرنا پڑیگی۔ وزارت پوسٹل کے ملک بھر میں قائم ریسٹ ہائوسز کو عوام کیلے کھول دیا گیا ۔

اس سلسلے میں وفاقی وزیر مراد سعید کی ہدایت پر با ضابطہ نوٹیفکیشن جاری کر دیا گیا ۔ نوٹیفکیشن کے مطابق شہری تفریحی مقامات کی سیر کے دوران سرکاری ریسٹ ہائوسز میں قیام کر سکیں گے،مسافر حضرات کو بھی سفر کے دوران مہنگے ہوٹلز میں قیام کرنے کی ضرورت نہیں،انتہائی کم معاوضے پر خوبصورت اور دلکش ریسٹ ہائوسز میں رہا جا سکے گا،مراد سعید کی ہدایت پر کراچی سے مری تک تمام ریسٹ ہاوسز کو خوبصورتی سے سجا دیا گیا،مری ایوبیہ،گلیات،سوات،گلگت اور مظفر آباد کی حسین وادیوں میں قائم ریسٹ ہائوسز آپ کے منتظر ہیں جبکہ لاہور کراچی پشاور اور کوئٹہ میں بھی سرکاری قیام گاہوں کی تزئین و آرائش مکمل کرلی گئی ،شہری کم سے کم 1200 اور زیادہ سے زیادہ 3000 روپے میں قیام کر سکیں گے،فیصلہ ملکی وسائل کے بہتر استعمال اور عوامی سہولت کے پیش نظر کیا گیا،اقدام سے حکومتی آمدن میں اضافہ اور عوام کے اخراجات میں کمی ممکن ہو سکے گی۔ بیان کے مطابق ریسٹ ہائوسز کہاں کہاں موجود ہیں معلومات پاکستان پوسٹ کی ویب سائٹ پہ ڈال دی گئی،شہری پاکستان پوسٹ کی ایپ سے بھی ریسٹ ہائوسز کی معلومات حاصل کر سکتے ہیں۔