لندن(این این آئی)گزشتہ برس ستمبر میں ریلیز ہونے والی فلم ’پنکی میم صاب‘ نے برطانیہ میں ہر سال ہونے والے ’یو کے ایشین فلم فیسٹیول‘ میں ایوارڈ جیت لیا۔’پنکی میم صاب‘ کو بہترین آڈینس 2019 کے ایوارڈ سے نوازا گیا، جب کہ فلم کی لندن اور ایڈن برگ سمیت متعدد شہروں میں خصوصی نمائش بھی کی گئی۔

رواں برس یوکے ایشین فیسٹیول کا 21 واں شو تھا، فیسٹیول کا آغاز گزشتہ ماہ 27 مارچ کو ہوا تھا۔فیسٹیول کے اختتام پر 7 اپریل کو ایوارڈ تقریب بھی منعقد کی گئی جس میں پاکستانی فلم سمیت ایشیا کے دیگر ممالک کی فلموں کو بھی ایوارڈز سے نوازا گیا۔ایوارڈ تقریب میں اداکاروں اور فلم سازوں کو بھی خصوصی ایوارڈز دیے گئے۔یوکے ایشین فلم فیسٹیول میں بھارت، پاکستان، نیپال، بنگلادیش اور برطانیہ میں رہنے والی ایشین کمیونٹی سمیت دیگر ایشیائی ممالک کی شوبز شخصیات نے شرکت کی۔’یو کے فلم فیسٹیول‘ برطانیہ کی غیر منافع بخش تنظیم ’ٹنگس آف فائر‘ کی جانب سے منعقد کیا جاتا ہے، اس فلم فیسٹیول کو پہلے لندن ایشین فلم فیسٹیول کے نام سے منعقد کیا جاتا تھا، تاہم بعد ازاں اس کا نام تبدیل کرکے یوکے ایشین فلم فیسٹیول رکھ دیا گیا۔گزشتہ برس اسی فلم فیسٹیول میں پاکستانی فلم ’کیک‘ کو ایوارڈ سے نوازا گیا تھا۔اس بار ’پنکی میم صاب‘ کو ایوارڈ کے لیے منتخب کیا گیا، جب کہ اس فلم کے علاوہ بھی رواں برس کئی پاکستانی فلمیں شائقین کی توجہ حاصل کرنے میں کامیاب گئی تھیں۔’پنکی میم صاب‘ کو دبئی کی فلم پروڈکشن کمپنی شاز میڈیا کے بینر تلے ریلیز کیا گیا تھا۔