لاہور(این این آئی) سینئر اداکارہ صباء حمید نے کہا ہے کہ 35سالوں سے شوبز کی دنیا سے وابستہ ہوں اور سمجھتی ہوں کہ جس نے تھیٹر نہیں کیا اسے اداکاری کی مکمل سمجھ نہیں آ سکتی ، غصے والی نہیں ،نئے اداکاروں میں سے کوئی رہنمائی لینا چاہتا ہے تو ضرور اسکی مدد کرتی ہوں ۔

انہوں نے ایک انٹرویو کے دوران کہا کہ مجھے اداکاری کا شوق نہیں تھا لیکن پی ٹی وی کی عمارت دیکھتی تھی تو اندر جانے کا شوق ضرور تھا ، مجھے پہلی دفعہ پی ٹی وی کے نامور پروڈیوسر شہزاد خلیل (مرحوم ) نے متعارف کروایااور پہلی ڈرامہ سیریل میں میرے ہمراہ عظمیٰ گیلانی بھی تھیں اس کے بعد یہ سلسلہ چل نکلا ۔ انہوں نے کہا کہ میں نے 80کی دہائی میں تھیٹر کیا اس وقت فردوس جمال اسٹیج ڈرامے پروڈیوس کیا کرتے تھے اور میں نے پہلا ڈرامہ بھی انکا ہی کیا ۔کسی فنکار کے لئے تھیٹر اکیڈمی کا درجہ رکھتا ہے اور میں سمجھتی ہوں کہ جس نے تھیٹر نہیں کیا اس کو اداکاری کی مکمل سمجھ نہیں آسکتی ۔صباء حمید نے ایک سوال کے جواب میں کہا کہ میں غصے والی نہیں ،اپنی بات منوانے یا دوسرے کی بات مان لینے کی عادی ہوں ،کسی اداکارہ سے کبھی کوئی مسئلہ نہیں رہا ۔ نئے اداکاروں میں سے کوئی رہنمائی لینا چاہتا ہے تو ضرور اسکی مدد کرتی ہوں ۔ انہوں نے کہا کہ مجھے حقیقی معنوں میں شناخت ڈرامہ سیریل ’’تیسرا کنارہ ‘‘ سے ملی جس کے پروڈیوسر شہزاد خلیل تھے اور اس ڈرامہ سیریل میں میرے ہمراہ عثمان پیرزادہ ،راحت کاظمی ، سارہ کاظمی اور دیگر اداکار شامل تھے ، میری ایک اور ڈرامہ سیریل ’’نشیب ‘‘ میرے لیے یادگار ہے جس کے پروڈیوسر ایوب خاور تھے جبکہ مزاحیہ سٹ کام ’’فیملی فرینڈ ‘‘بھی میری زندگی کے یادگار لمحات میں سے ہے ،ڈاکٹر یونس بٹ میرے پسندیدہ رائٹر ہیں ۔