اسلام آباد/سری نگر( آن لائن) قابض بھارتی انتظامیہ اوچھے ہتھکنڈوں پر اترآئی ، کشمیری میڈیا کے خلاف کریک ڈاؤن تاحال جاری ہے جس کے خلاف تمام اخبارات نے احتجاجاً پہلے صفحے پر کچھ شائع نہیں کیا۔
کشمیر ایڈیٹرز گلڈ نے بھارتی انتظامیہ کی جانب سے اخبارات کے خلاف کریک ڈاؤن کی شدید مذمت کی ہے۔تفصیلات کے مطابق مقبوضہ کشمیر میں اتوار کو شائع ہونے والے تمام چھوٹے بڑے اخبارات نے ناروا سلوک اور اشتہارات کے معاملے پر تنگ کرنے پر احتجاجاً سرورق خالی چھوڑ دیا جس کا مقصد احتجاج ریکارڈ کرانا ہے۔ بھارتی انتظامیہ نے وادی میں بھارتی فوج کے مظالم دکھانے والے نامور اخبار ‘گریٹر کشمیر’ اور ‘کشمیر ریڈرز’ کو خاموش کرنے کے لیے ان کے اشتہارات روک لیے ہیں،مذکورہ اخبارات سے اظہار یکجہتی کرتے ہوئے کشمیر آبزرور اور کشمیر مانیٹر سمیت دیگر اخبارات نے بھی اپنے سرورق پر کوئی خبر شائع نہیں کی۔دوسری جانب سے پاکستان اور بین الاقوامی میڈیا نے مقبوضہ کشمیر میں بھارتی انتظامیہ کی جانب سے کشمیر میڈیا پر ہونے والی نا انصافیوں اور ظالمانہ کارروائیوں کی شدید مذمت کی ہے اور کہا ہے کہ حق و سچ کی آواز کو ان اوچھے ہتھکنڈوں سے دبایا نہیں جا سکتا ۔انہوں نے مطالبہ کیا کہ بین الاقوامی ممالک فوری طور مداخلت کر کے بھارت کو میڈیا کیخلاف ہونے والے ظالمانہ کارروائی سے روکے۔
