اسلام آباد (نیوز ڈیسک) اخروٹ قدرت کی وہ نعمت ہے جسے ہم عام طور پر ایک پرلطف خوراک کے طور پر جانتے ہیں لیکن ایک حالیہ سائنسی تحقیق میں معلوم ہوا ہے کہ یہ کینسر سے بچاو¿ کا بھی بہترین نسخہ ہے۔ ہارورڈ میڈیکل سکول کے سائنسدانوں نے تجربات سے معلوم کیا ہے کہ روزانہ مٹھی بھر اخروٹ کھانے سے جسم کو اومیگا 3 فیٹی ایسڈ، مختلف آکسیڈنٹ، معدنیات اور وٹامنز کا خزانہ دستیاب ہوتا ہے جو کینسر سے تحفظ فراہم کرتے ہیں اور اگر کینسر پیدا ہوچکا ہو تو اس کے پھیلاو¿ کو روکتے ہیں۔ اخروٹ میں پائے جانے والے اجزاءکینسر زدہ خلیوں کی طرف خون کی فراہمی کو محدود کردیتے ہیں جس کی وجہ سے کینسر باقی جسم میں نہیں پھیل سکتا۔ چوہوں پر کئے گئے تجربات میں یہ ثابت ہوچکا ہے کہ اخروٹ کے استعمال سے اومیگا تھری کی مقدار میں تقریباً 10 گنا اضافہ ہوجاتا ہے جو کینسر کی رسولیوں کو روکنے میں انتہائی کارگر ثابت ہوتا ہے۔ تحقیق کے سربراہ ڈاکٹر کرسٹوس مانٹزورس کا کہنا ہے کہ مائیکرو رائبو نیوکلیئک ایسڈ پر اخروٹ کے اثرات کا جائزہ لینے والی یہ پہلی تحقیق تھی اور اس کے نتائج انتہائی حوصلہ افزا ہیں۔ یہ تحقیق سائنسی جریدے ”نیوٹریشنل بائیو کیمسٹری“ میں شائع کی گئی ہے۔