اسلام آباد(مانیٹرنگ ڈیسک) شیخ رشید کے پبلک اکاونٹس کمیٹی کا رکن بنے کے اعلان پر مسلم لیگ ن پریشانی کا شکار ۔راستہ روکنے کیلئے سپیکر قومی اسمبلی اسد قیصرسے مد د مانگ لی ۔ن لیگ کے رہنماؤں نے سپیکر قومی اسمبلی اسد قیصر سے شیخ رشید کو پبلک اکاؤنٹس کمیٹی کا رکن نہ بنانے کی درخواست کردی۔

روزنامہ 92نیوزکے مطابق ن لیگ کے رہنماؤں نے شیخ رشید کے پبلک اکاؤنٹس کمیٹی کا رکن بننے سے تلخی بڑھنے اور ماحول خراب ہونے کے خد شہ کا اظہا ر کیاہے ۔ن لیگ کے رہنماؤں نے اس پارلیمانی سطح پر فضا خوشگوار رکھنے کیلئے اپنا کردار ادا کرنے کی درخواست کی۔اس حوالے سے سینٹ میں قائد حزب اختلاف راجہ ظفر الحق نے کہا کہ میں نے تو سپیکر قومی اسمبلی سے اس بار ے ملاقات نہیں کی لیکن ہمارے کچھ دوست سپیکر قومی اسمبلی کو ملے ہیں ۔ میں سپیکر سے رابطہ کرنے والوں کے نام نہیں بتاسکتالیکن ہمارے چند لوگوں نے سپیکر کو اس بارے اپنے موقف سے آ گاہ کیا ہے ۔اگر شیخ رشید پبلک اکاؤنٹس کمیٹی کے رکن بنے تو فضا تلخ ہو جائے گی۔انہوں نے کہا کہ شیخ رشید کے علاوہ بھی 3چار حکومتی افراد فضا خراب کررہے ہیں ۔ان کو روکنا سپیکر کا نہیں وزیر اعظم کا کام ہے ۔وزیر اعظم ان تین چار افراد کو روکیں۔ابھی تک پارلیمانی امور چلانے میں سپیکر کا کردار ٹھیک ہے ۔انہوں نے کہا کہ ابھی یہ نہیں بتاسکتا کہ اس معاملہ پر سپیکر کا کیا موقف ہے تاہم سپیکر ٹھیک کام کررہے ہیں۔ذرائع کے مطابق شیخ رشید کی پبلک اکاؤنٹس کمیٹی میں شمولیت کی کو شش ناکام بنانے کے لیے اپوزیشن جماعتوں میں رابطے جاری ہیں ۔مسلم لیگ ن چاہتی ہے کہ پیپلز پارٹی بھی اس معاملہ پر کھل کر مسلم لیگ ن کا ساتھ دے ۔