اسلام آباد (این این آئی)وفاقی وزیر برائے امور کشمیرعلی امین گنڈا پور نے سابق چیئرمین کشمیر کمیٹی مولانا فضل الرحمن پر کشمیر فنڈ کا پیسہ ہڑپ کرنے کا الزام لگاتے ہوئے کہا ہے کہ تحقیقات ہورہی ہیں ، جلد مولانا فضل الرحمن جیل میں قید نوازشریف کے ساتھ ہونگے ۔ نجی ٹی وی سے بات چیت کرتے ہوئے امین گنڈا پور نے کہا کہ فضل الرحمن پیسہ کھانے کیلئے چیئرمین کشمیر کمیٹی بنتے رہے ہیں۔انہوں نے کہا کہ کشمیر فنڈ کا پیسہ ہڑپ کرنے پر فضل الرحمن کے خلاف تحقیقات ہورہی ہیں،جلد وہ بھی جیل میں قید نواز شریف کے ساتھ ہوں گے۔وفاقی وزیر نے کہا کہ
فضل الرحمن نے ہمیشہ شہیدوں کے خون پر پیسہ بنایاہے۔علی امین گنڈا پور نے کہا کہ (ن )لیگ کی حکومت مودی سرکار سے تعلقات بنانے میں لگی رہی جبکہ ہماری حکومت نے بھارت سے مذاکرات کی بات کی۔انہوں نے کہا کہ ہم نے بھارت سے مذاکرات کی بات اس لئے کی تاکہ دنیا کو بتایا جائے کہ مذاکرات کے دروازے کھلے ہیں۔وفاقی وزیر برائے امور کشمیر نے کہا کہ کشمیر کے معاملے پر دیگرملکوں کو آگاہ کریں گے،فلم بنا رہے ہیں دنیا کو کشمیر میں بھارتی مظالم کا چہرہ دکھائیں گے۔انہوں نے کہاکہ گلگت بلتستان کے عوام کی محرومی دور کرے گی۔
