نئی دہلی (نیوزڈیسک)بھارت میں ڈاکٹروں نے افغان اہلکار کے دونوں ہاتھ ٹرانسپلانٹ کرنے کا کامیاب آپریشن کیا ۔افغان پولیس اہلکار افسر عبد الرحیم کے دونوں ہاتھ 2012 میں ایک بارودی سرنگ کے دھماکے میں کٹ گئے تھے۔عبدالرحیم صوبہ قندہار کے رہائشی ہیں اور انھوں نے 2001 میں پولیس میں شمولیت اختیار کی تھی۔عبدالرحیم کا بھارت کے ایک ہسپتال میں 15 گھنٹے کا کامیاب آپریشن ہوا۔ آپریشن کے بعد بی بی سی سے گفتگو کرتے ہوئے انھوں نے کہا کہ جب وہ ہوش میں آئے تو اپنے نئے ہاتھوں کو دیکھ کر خوشی بیان نہیں کر سکتے تھے مجھے یقین نہیں آ رہا تھا، اس سے پہلے میں ایک زندہ لاش کی طرح تھا مگر نئے ہاتھوں نے مجھے نئی زندگی دے دی ہے عبدالرحیم کو ایک بھارتی شہری کے ہاتھ لگائے گئے ہیں جو کچھ عرصہ پہلے ایک ٹریفک حادثے میں ہلاک ہو گئے تھے۔عبدالرحیم کے مطابق آپریشن کے بعد انھوں نے ہاتھ عطیہ کرنے والے شخص کے خاندان سے ملاقات کر کے ان کا شکریہ ادا کیا اور میں ساری زندگی ان کا احسان مند رہوں گا۔آپریشن کی فیس اور دوسرے اخراجات کے بارے میں انھوں نے کہا کہ افغان حکومت کی جانب سے کوئی خاص مالی مدد نہیں ملی . تمام اخراجات انھوں نے خود اپنے دوستوں اور اپنے علاقے کے لوگو ں کی مدد سے جمع کیے۔عبدالرحیم نے کہا کہ وہ چاہتے ہیں کہ پوری طرح صحت یاب ہونے کے بعد پھر سے پولیس سروس میں شامل ہو جائیں۔عبدالرحیم نے کہا کہ آپریشن کے بعد انھوں نے اپنے پرانے دستخط بھی کیے۔