مقبوضہ بیت المقدس (این این آئی)فلسطین کی دینی اور مذہبی قوتوں نے خبردار کیا ہے کہ مقبوضہ بیت المقدس بالخصوص مسجد اقصیٰ کے تاریخی اسٹیٹس کیساتھ چھیڑ چھاڑ کی گئی تو اس کے بھیانک نتائج برآمد ہوں گے اور اس کی تمام تر ذمہ داری اسرائیل پر عائد ہوگی۔القدس کی اوقاف کونسل، سپریم اسلامک کونسل، شعبہ الافتا اور القدس اسلامی اوقاف کے علاوہ القدس کی دیگر مذہبی جماعتوں نے کہا ہے کہ اسرائیل طے شدہ منصوبے کے تحت مسجد اقصیٰ کے تاریخی، قانونی اور مذہبی اسٹیٹس کو پامال کر رہا ہے۔بیان میں

مزید کہا گیا ہے کہ اسرائیل علاقائی، عرب اور اسلامی دنیا میں جاری خلفشار کی کیفیت سے فائدہ اٹھانے اور امریکی فیصلوں سے فائدہ اٹھا کر قبلہ اول کو نقصان پہنچانے کی سازشیں کر رہا ہے۔بیان میں قبلہ اول کی بنیادوں میں جاری کھدائیوں، مقدس مقام پر یہودیوں کے دھاووں اور مسجد اقصیٰ میں نمازیوں پر اسرائیلی فوج اور پولیس کے حملوں کی شدید مذمت کی گئی۔فلسطین کے مذہبی اداروں نے عالم اسلام اور عرب ممالک پر زور دیا ہے کہ وہ قبلہ اول کے دفاع اور القدس کی آزادی کیلئے اپنی ذمہ داریاں پوری کریں۔

موضوعات:مسجد اقصیٰ