راولپنڈی (این این آئی)پاک فوج کے سربراہ جنرل قمر جاوید باجوہ نے کہاہے کہ پاکستان کی خوشحالی بلوچستان کی خوشحالی سے جڑی ہوئی ہے۔ منگل کو آرمی چیف جنرل قمر جاوید باجوہ سے تیسری نیشنل سیکیورٹی ورکشاپ کے شرکاء نے جی ایچ کیو میں ملاقات کی ۔ آئی ایس پی آر کے مطابق ملاقات کوئٹہ میں منعقد کی گئی تین ہفتوں پر مشتمل ورکشاپ کا حصہ تھی۔ آئی ایس پی آر کے مطابق ہماری قوم نے قیام امن کے لئے لاتعداد قربانیاں دیں۔
آرمی چیف نے کہا کہ پاکستان کی خوشحالی بلوچستان کی خوشحالی سے جڑی ہے۔پاک فوج کے سربراہ نے کہا کہ ہمارے اندرونی و بیرونی چیلنجز جامع قومی ردعمل کا تقاضا کرتے ہیں۔انہوں نے کہا کہ فوج دوسرے ریاستی اداروں سے مل کر اس ردعمل کو بنانے میں مکمل طور پر یکسو ہے۔ آئی ایس پی آر کے مطابق سیکیورٹی ورکشاپ کا حصہ بنائے جانے پر شرکاء نے تشکر کا اظہار کیا اور قومی ترقی میں اپنا بھرپور کردار ادا کرنے کے عزم کا بھی اظہار کیا۔
