ممبئی(آئی این پی) بالی ووڈ اداکارہ کنگنا رناوت نے ان کی فلم مانی کارنیکا پر تنقید کرنے والوں کو جواب دیتے ہوئے کہا ہے کہ میری فلم دیکھنے کے بعد لوگوں کے منہ بند ہوجائیں گے۔ اداکارہ کنگنا رناوت ان دنوں زوروشورسے اپنی آنے والی فلم مانی کارنیکا کوئین آف جھانسی کی تشہیر میں مصروف ہیں، فلم میں کنگنا جھانسی کی رانی لکشمی بائی کے کردارمیں نظر آئیں گی، کنگنا اس فلم پر گزشتہ دوسالوں سے کام کررہی ہیں تاہم اپنی تیاری کے دوران یہ فلم کئی تنازعات کا شکار ہوئی۔

فلم مانی کارنیکا کا ٹریلر چند روز قبل منظرعام پر آیا تھا جہاں ٹریلر کو شائقین کی جانب سے اچھا ردعمل ملا وہیں ٹریلر پر بہت سارے لوگوں نے تنقید بھی کی۔ کنگنا رناوت نے اپنی فلم پر تنقید کرنے والوں کو کرارا جواب دیتے ہوئے کہا ہے جولوگ میرے اورمیری فلم کے متعلق اچھا نہیں بول رہے مجھے یقین ہے میری فلم ان کے منہ بند کردے گی۔ واضح رہے اداکارہ کنگنا رناوت مانی کارنیکا کے ساتھ ہدایت کاری کے شعبے میں بھی قدم رکھ رہی ہیں۔ فلم اگلے سال 25 جنوری کو ریلیز کی جائے گی۔