لاہور(این این آئی) آل پاکستان انجمن تاجران کے صدر اشرف بھٹی نے بجلی کی قیمتوں میں حالیہ اضافے پر سخت تشویش کا اظہار کرتے ہوئے کہا ہے کہ حکومتی اقدامات آئی ایم ایف کی شرائط کو پورا کرنے کی کڑی ہیں، بندکمروں میں بیٹھ کر معیشت پر تجربات کرنے کے انتہائی منفی نتائج برآمدہو رہے ہیں۔
جس کا ہر طبقے کو خمیازہ بھگتنا پڑ رہا ہے ۔ان خیالات کا اظہار انہوں نے اپنے دفتر میں تاجروں اور ٹیکس کنسلٹنٹ پر مشتمل وفد سے ملاقات میں گفتگو کرتے ہوئے کیا ۔ اس موقع پر تاجروں کو درپیش مسائل اور ٹیکسیشن کے نظام میں پیچیدگیوں کے حوالے سے تبادلہ خیال کیا گیا ۔اشرف بھٹی نے کہا کہ بجلی اور گیس کی قیمتوں میں حالیہ اضافے سے پیداواری لاگت مزید بڑھ گئی ہے جس سے چھوٹی صنعتیں چلانے والوں کی کمر ٹوٹ گئی ہے ۔ تاجروں کیلئے یوٹیلٹی بلز کی ادائیگی اوردیگر اخراجات پورے کرنا مشکل ہوگیا ہے اور وہ اپنا کاروبار بند کرنے پر مجبور ہو گئے ہیں۔ انہوں نے کہا کہ ملک میں مہنگائی اوربیروزگاری کا سیلاب آیا ہوا ہے جبکہ حکومت کی جانب سے اس کے سد باب کیلئے عملی طو رپر کوئی اقدامات نہیں کئے جارہے ۔ چندافراد کمروں میں بیٹھ کر فیصلہ کرتے ہیں جسے باہر آکرنافذکرنے کا حکم سنادیا جاتا ہے ،اس طرح کے اقدامات قابل تشویش ۔انہوں نے کہا کہ حکومت مشاورت کی پالیسی اپنائے اورتاجروں سمیت ہر طبقے کو اعتما دمیں لے کر فیصلے کئے جائیں جس کے مثبت اور دورس نتائج برآمدہوں گے۔مطالبہ ہے کہ حکومت آئندہ ماہ ممکنہ پیش کئے جانے والے منی بجٹ کے حوالے سے تمام اسٹیک ہولڈرز کو اعتمادمیں لے اوران کی تجاویزکوبھی اہمیت دی جائے ۔
