مانسہرہ(مانیٹرنگ ڈیسک) تحریک انصاف کی حکومت نے الیکشن میں کیا گیا وعدہ پورا کرتے ہوئے تحصیل ہیڈ کوارٹر بفہ میں زچگی کے آپریشن کی سہولت مہیا کردی۔ تفصیلات کے مطابق مانسہرہ کے علاقے بفہ کے تحصیل اسپتال میں انتظامات مکمل کردیے گئے ہیں اور آج اس سہولت کی
دستیابی کے بعد پہلےآپریشن کے ذریعے بچے کی ولادت عمل میں لائی گئی ہے، زچہ بچہ دونوں محفوظ اور صحت مند ہیں ۔ آپریشن کرنے والی گائنا کالوجسٹ کا کہنا ہے کہ یہ سہولت اس علاقے میں کسی نعمت سے کم نہیں ، اس سے قبل کسی ایمرجنسی کی صورت میں زچہ کو مانسہرہ منتقل کرنا پڑتا تھا جس میں اکثر و بیشتر ماں اور بچے دونوں کی جان ضائع ہوجاتی تھی۔ ان کا کہنا تھا کہ اس سہولت سے اب ہم مستقبل میں اس علاقے کی کئی ماؤں اور ان کے بچوں کی زندگیاں بچا سکیں گے۔ اسپتال میں پہلے آپریشن کی کامیابی پر علاقہ مکینوں نے خوشی کا اظہار کیا ہے اور کہا ہے کہ یہ حکومت کا اہم قدم ہے۔ مانسہرہ کی تحصیل بفہ کی کل آبادی تین لاکھ نفوس پر مشتمل ہے اور انہیں صحت کی سہولیات فراہم کرنے کے میں تحصیل ہیڈ کوارٹر اسپتال مرکزی کردار ادا کرتا ہے ۔ علاقے میں کسی بھی بیماری کی صورت میں سب سے پہلے مریضوں کو یہیں لایا جاتا ہے۔ یاد رہے کہ صحت کی بنیادی سہولیات کی فراہمی آئینِ پاکستان کے تحت دیہی اور شہری ہر باشندے کا حق ہے ، تاہم ماضی میں عوام کے اس حق کی جانب سے غفلت برتنے کا مظاہرہ کیا جاتا رہا ہے۔
