دبئی(آئی این پی)حکومت دبئی نے سرکاری ملازمین کے لئے13قسم چھٹیاں لینے کی منظوری دیدی ہے۔لیبر قوانین میں ترمیم کرتے ہوئے ہیومن ریسورسز کے ادارے نے کہا ہے کہ تمام سرکاری ملازمین کو سالانہ چھٹی کے علاوہ بیماری کی چھٹی،خاتون ملازمہ کے لئے حمل ووضع کی چھٹی،مرد ملازم کے لئے بیوی کی بیماری میں بچوں کی نگرانی کرنے کی چھٹی،رشتہ داروں کی وفات پر تعزیت کی چھٹی،حج کی چھٹی،مختلف حکومتی سرگرمیوں میں حصہ لینے والوں کی چھٹی،کسی مریض کی نگرانی کرنے کی چھٹی، شوہر کے سفر
کے وقت بیوی کو چھٹی،سکول کی چھٹی، تنخواہ کے بغیر چھٹی اور حکومتی فرائض سرانجام دینے کی چھٹی شامل ہے۔سالانہ چھٹی کے ضمن میں12گریڈ کے ملازمین کو 30دن،11ویں گریڈ سے4گریڈ کے ملازمین کے لئے25دن جبکہ تیسرے گریڈ اور اس کے نیچے کے ملازمین کے لئے 18دن کی چھٹی مقرر کی گئی ہے۔حکومت نے ادارے کو پابند کیا ہے کہ ملازم کی طرف سے چھٹی کی درخواست وصول کرنے کے10دن کے اندر جواب دینا ضروری ہے۔بصورت دیگر چھٹی کی درخواست قبول سمجھی جائے گی۔
