اسلام آباد(مانیٹرنگ ڈیسک)بھارتی آرمی چیف کی ہرزہ سرائی پر پاک فوج کا بھی ردعمل سامنے آگیا، جنرل بپن راوت کو کرارا جواب دیدیا گیا۔ تفصیلات کے مطابق ترجمان پاک فوج میجرجنرل آصف غفور باجوہ نے آج میڈیا بریفنگ سے خطاب کرتے ہوئے کہا کہ بھارت کو ہمیں ویسا برداشت کرنا پڑے گا جیسے ہم ہیں، ان سے سوال پوچھا گیا تھا کہ بھارتی آرمی چیف نے کہا ہے کہ پاکستان پہلے سیکولر ریاست بنے پھر ہم اس سے مذاکرات کا سوچیں گے جس پر جواب دیتے ہوئے میجر جنرل آصف غفور

کا کہنا تھا کہ پاکستان اسلام کے نام پر بنا اور ہم مسلمان ہیں ، بھارت کو ہمیں ویسا برداشت کرنا پڑے گا جیسا ہم ہیں۔ بھارت کو کون سیکولر ملک کہتا ہے؟ وہاں کروڑوں مسلمانوں کیساتھ کیا ہو رہا ہے ، دنیا دیکھ رہی ہے، ہم نے اپنے ملک میں اقلیتوں کو تحفظ فراہم کیا ہے، ہم نے سکھ برادری کیلئے اپنا بارڈر تک کھول دیا ، ہم گرجا گھروں اور مندروں کو سکیورٹی فراہم کرتے ہیں۔ اقلیتیں خود کو یہاں محفوظ تصور کرتی ہیں جبکہ اس کے برعکس بھارت میں اقلیتوں کیساتھ کیا سلوک روا رکھا جا رہا ہے۔